Shillong, Rymphang, 29: Ki nongïalam jong ka Hynñiewtrep Achik National Movement (HANM) ha ka sngi Palei ki la ujor da ka ejahar ha u Superitendent of Police (SP) ka East Khasi Hills District halor ka jingbym pyndem jong uwei u briew uba kynthoh pyrshah ïa ka HANM ha ka Facebook Page ba la ai kyrteng ‘Lympung ki Khun ka Ri’, wat hadien ba ka jingaipor kaba 24 kynta ka la kut.
Katkum kane ka jingkynthoh ha kane ka Facebook Page, u nongkynthoh uba la paw kyrteng kum u HBK Lyngdoh u la kynthoh pyrshah ïa ka seng da kaba kynnoh ba ka jingpynlong ka HANM ïa ka jingïakhih ha Jantar Mantar ha nongbah Delhi ha ka 3 tarik Naiweing 2023 ka dei kaba la bei pisa da ka National People’s Party (NPP).
U nongkynthoh HBK Lyngdoh u kynthoh kumne: “Kawei na ki sengbhalang kaba leit pynthud ïa ka jingdawa pynrung ïa ka ktien Khasi ha ka 8th Schedule ka dei ka HANM. Kane ka Seng ka la leit sha Delhi ban dawa pynrung lang ïa ka ktien Khasi bad ka ktien Garo. Ka ktien Garo kam pat long qualified ban rung ha ka 8th Schedule te da dawa pynrung lang ha kajuh ka por ka ktah ïa ka ktien Khasi kaba lah long qualified ban rung ka hap ap haduh da ki phew snem shuh shuh ban ïa rung ryngkat bad ka Garo haduh ban da long qualified ka Garo.”
“Lehse ban leit pynthud kumtei dei ba sponsor da ka npp.”
U nongïalam ka Seng u Bah Wyraiwan Sohtun ha ka jingïakren bad ki lad pathai khubor u la ong, “katkum ka hok ban kren, phi don ïa ka hok ban kren, ban pynsngew hynrei phim lah patde ban kren shaba palat pud kaba lah ban pynjah burom bad ba phin shu thaw da ki lad ki lynti ban pynjah burom bad ban pynduh mynsiem ïa kaei kaei kaba ki briew ki trei shitom na ka bynta ki jingbha jong ki paidbah.”
“Lada phi kwah ban tip ïa ka jingshisha phi lah ban wan sha ka ophis treikam jong ka HANM ngin ai ïa ka jingshisha bad phim lah ban shu kynnoh ïa ngi ïa kaei kaba phim lah ban pynshisha,” la ong u Bah Sohtun.
“Katkum ka hok ba la ai da ka Article 19 (1) A phim lah ban shu pynjah burom lane ban shu bein shu khoh haduh ba kiwei kiwei kin sngew ba ka jingtrei shitom jong ki ban wanrah ka jingbha bad ka jingsuk kan shu duhei noh,” u la ong.
U Vice President ka seng u Bah Bawan Nongsiej u la ïathuh ba mynta ka shong sa ha ki bor jong ka ain ban leh ïa kaba donkam namar ba ka seng ka ladep ban ujor sha ki Pulit.
Haba kyntait ïa ka jingshah kynnoh, u Vice President ka HANM Bah Bawan Nongsiej u la pynshai ba ka jingïakhih jong ka seng ka dei na ka bynta ki dawbah jong ka jaitbynriew na ka bynta ban pynurlong ïa ka jingdawa ban pynrung ïa ka Ktien Khasi ha ka Khyrnit Baphra jong ka Riti Synshar ka ri India kumba la mynjur da ka Iingdorbar Thawain ka Jylla ha ka 27 tarik Nailur 2018.
