Bym maramot shuh ka NHAI ïa ka surok NH-6, leit khang tala ka JSM ïa ka Toll Plaza ha Lumshnong

Khliehriat nailur 26: Namar ka jingleh mynthi ka National Highway Authority of India ka bym shym la shim khia ban maramot ïa ka surok national highway ha East Jaiñtia Hills District, ki nongïalam bad ki dkhot jong ka Jaiñtia Students Movement mynta ka sngi ki la hiar bad khang tala shi syndon ïa ka jaka lum khajna, ka Toll Plaza jong ka NHAI kaba don ha Lumshnong.
Haba kren sha ki pathai khubor, u Working President jong ka JSM Central Body, u bah Jimmy Kharmuti, u la ong ba “Na ka liang ka JSM ka phah ka kyrwoh sha ka sorkar jylla bad sha u myntri ba dei peit ba ngi ngim kwah ba phin wanrah da ka Casino, ngi kwah ban ïoh ïa ka surok kaba bha, namar ka jinglong jingman ka ne ka surok NH-6 ka la sniew shaba palat, ka la dap sa tang da ki thliew kiba heh kaba buh jingma bad buh jing eh ïa ki paidbah nongleit nongwan. Kumta, sngewbha u Conrad Sangma bad Bah Prestone Tyngsong ban pynkloi noh ïa kane ka kam ban ïakren bad ka NHAI namar ba kane ka surok kam i dei shuh kum kata ka surok bah ne ka national highway”
U President JSM Eastern Region, u samla Wellson RD Siangshai u la ong ba kane ka jinghiar ka seng JSM ban khangtala ïa kane ka Toll Plaza ka long halor ka nongrim namar ka jingsniew palat ka surok national highway ha East Jaiñtia Hills District, u la ïathuh ruh ba na ka liang u Project Manager jong ka NHAI, ha ka shithi ba u la phah sha u Deputy Commissioner ka East Jaiñtia Hills District u la buh ka por ba un maramot ïa kane ka surok hynrei ynda la kut ka por ba la buh ruh ka NHAI ka khlem lah ban pyndep ïa ka kam kumba la kular bad kane ka paw ba ka NHAI ka la shukor ïa ka district “Kumta ngi da ka mynsiem ba sngew khia ngi la wan ban khang tala ïa kane ka Toll Gate kaba lum khajna na ki kali, ngi kren shai mynta sha ka sorkar bad sha ka NHAI ba lada ym maramot ïa ka surok ngi da lei lei ngin nym ailad ïa ki bar jylla ba kin shu wan kamai spah na kane ka ri jong ngi bad na ka district jong ngi namar kam don jingmyntoi eiei ïa ki paidbah” ong u bah Siangshai.
Ha kaba iakren bad u Manager jong ka Toll Gate Lumshnong, u Hassan Malik, u nongialam ka JSM u bah Jimmy Kharmuti, u la ong ba ka NHAI kam dei ban ot ne pynduna ïa ka bainong jong ki nongtrei hynrei ka dei ban pynbiang beit ïa ka tulop jong ki nongtrei watla khang tala ïa kane ka jaka lum khajna ruh, u la ong ba ka don ka aiñ halor kane ba ym dei ban pynduna ïa ka tulop ki nongtrei. La byrngem ruh ba ka seng kan ïaid shakhmat katkum ka aiñ bad halor kane utei u manager, u Hassan Malik u la kongnguh ban nym pynduna ne ot ïa ka bainong ki nongtrei.