Bym lah tehlakam ïa ki kam sniew, dei ban weng noh mardor ïa ka DC EKHD, dawa ka BJP

Shillong, Risaw 13: Ka Seng Saiñ pyrthei ka ri ka Bharatiya Janata Party (BJP)-Meghalaya, ha ka sngi Nyngkong ka la dawa ban weng noh mardor ïa ka Deputy Commissioner ka East Khasi Hills, da kaba pyni ïa ka jingbym lah jong ka bor synshar district ban tehlakam ïa ka jingkiew jong ki kam runar pyrshah ïa ki khynnah kiba la jia dangshen.
Lyngba la khubor ba la pynpaw ha ka sngi Nyngkong, u General Secretary ka BJP u Bah Wankitbok Pohshna ula pynpaw ïa ka jingsngewkhia kaba jur halor ka jingnang kiew ki jingjia pyntriem, ki kam runar, ha kaba kynnoh ba ki bor District kim shym la lah ban trei bad leh bha ïa la ka kamram.
U la ong, “Ka bor district kam dei ban donkam ïa ngi ba ngin pynkynmaw ïa ki ïa ka kamram jong ki ne ban batai ïa ki kumno ban pyndep ïa ka kamram jong ki. Ki ophisar kiba don ka jingkitkhlieh ki donkam ban pyndonkam ïa la ka jong ka bor khlem da kheiñ ïa kano kano ka jingpynbor. Lada kam jia kumta, ka sorkar ka dei ban weng noh mardor ïa kum kine ki ophisar ki bym lah ban pynïaid ïa ka bor synshar distrik bad bujli ïa ki da kiba briew ba lah bad ba don ka jingkitkhlieh.”
Na ka liang u Bah Pohshna u la kynnoh ba kam don satia ka jingshim ïa ki lad ki lynti kiba biang da ka bor synshar distrik ban ïada ïa kum kine ki kam runar, kynthup ïa ka jingduna ban don ki pulit, ka jingbym don ka pahara ba man ka por, bad ka jingbym don ka jingpahara miet kaba la pynbeit ryntih.
Shuh shuh u la ban jur ïa ka jingdonkam ban pynkhlaiñ ïa ki lad jingïada, kum ka jingpeitngor baroh shisngi ïa ki jaka rung bad jaka mih, ka jingbuh ïa ki Village Defense Parties (VDP) bad ki pulit, bad ka jingpynïadon bynta lang ïa ki nongtrei mon sngewbha na ka thaiñ ban pynthikna ïa ka jingshngaiñ jong ki khynnah.
U nongïalam ka BJP u la kynthoh jur ïa ka bor synshar ba ka leh smat leh sting tang ha ki prokram ba kyrpang, kum ka tamasa Cherry Blossom ne ki jingïalehkai phutbol, katba ka iehnoh ïa ki mat kiba kongsan kum ka jingdih kyiad ha ka por miet bad ka jingdih drok ha ki bynta bapher bapher jong ka nongbah Shillong.
Na ka liang u Bah Pohshna u la kyntu ïa ka sorkar ba ka dei ban pan jingïarap na ka Home Ministry ka Sorkar Pdeng bad ki riew shemphang ban lap bad weng ïa ki daw tynrai jong kine ki kam sniew kiba ju ïai jia manla ka por.