Shillong, Nailur 06: Na ka daw ka jingker sainar shiah ha khappud ka India -Bangladesh la pynlong ïa kumba 82 tylli ki longïing ka Rongara-Siju constituency ha South Garo Hills ban shong ban sah ha ka ‘no man’s zone’ ne ka jaka bym don trai mano mano, naba kane ka kam ker sainar ka pynkheiñ ïa bynta kiba dei ban ïaid.
Ïa kane la ïathuh da u Myntri ka sorkar jylla bad u MLA ka constituency, u Rakkam Sangma. U la ong ba ïa kane ka kam yn sa ïakren bad ka Home Ministry naba kine ki longïing mynta ki sah ha ka jingtieng ba ïoh ki shah tan ban sah noh sha Bangladesh.
U la ong ba ki longïing ki dei ki nong India hynrei ki la shah pynngat sha ri Bangladesh hadien ba la pynieng bad ker sainar shiah ha khappud. “Bun na ki jingtei ha khappud India-Bangladesh ki khlem long katkum ki bynta ba dei ban bud,” u la ong.
“Ngi sa ïakren bad ka ministry ban leh eiei khnang ba kine ki longïing kin shah pynkynriah bad ban wanphai biang sha India,” u la bynrap.
U Sangma u la ong ba ka jingker sainar shiah ha khappud ka long ban tehlakam ïa ka jingwan rungtuh ha khappud na Bangladesh sha India bad ïa kane la dei ban leh na ka 150 yard (137 metre) na zero line, ha kaba khlem da la bud ha kiba bun ki jaka kumta ka khyndew jong ka ri India ka la leit noh sha ka liang ka ri Bangladesh.
“Bun na kane ka kam ker sainar shiah ka la long shalyndet ka 150, 300, 400 bad 500 meter bad halor kane ka kam bun na ka khyndew ka la shu leit ei sha Bangladesh,” u la ong.
Lah ban kdew ba na ka 443km ka khappud ka Indo-Bangla ha Meghalaya, dang bun ki jaka ha Khasi bad Jaiñtia Hills ym pat ker sainar shiah satia.
Kham hashwa kane ka snem, ka sorkar jylla ka la thoh sha ka ministry ha kaba la banjur ba ka jingker sainar shiah dei ban leh beit na Zero Line, kaba dei u pud u sam ba shisha hapdeng kine ki ri bad ym dei napoh u pud u sam ka ri India.
