Mawsynram, ‘Nailur, 28: Ka Kynhun ki Sengbhalang jong ka Mawsynram C&RD Block (KSMC&RDB) ha ka 27 tarik u ‘Nailur, 2022 namar ka jingbymlad ban rung shapoh phyllaw jong kawei na ki jaka pule (college) hapoh Mawsynram kim banse ban hap ban ap harud surok tang ban ïoh ïa kren bad ai ruh ïa ka Dorkhas ha u Conrad Sangma, Myntri Rangbah jong ka Jylla Meghalaya.
Katkum ka jingai jingpyntip na ka Kynhun ki Sengbhalang jong ka Mawsynram C&RD Block (KSMC&RDB) kiba kynthup ïa ka KSU, FKJGP, HUAM, HYC bad ka HANM ba u Myntri Rangbah ka Jylla Meghalaya, u Conrad Sangma u la hiar sha Mawsynram ha ka jingrakhe dap 25 snem ka Border Area College, Mawsynram ha kaba ma ki ruh ki la don ka jingthmu ban leit ai ïa ka dorkhas hynrei kaba sngewsih ki Sengbhalang kim ïoh lad ban ïa kynduh ha katei ka jingïalang. “Watla kata ruh kim banse ki hap ap shrip ïa u Myntri Rangbah ha shiteng lynti ha surok tang ban ïoh aiti ïa ka dorkhas na ka bynta ka daw bah jong ka dong ka thaiñ ban dawa ban kyntiew noh ïa ka C&RD Block Mawsynram sha ka Civil Sub Division”, ong ka tyllong khubor.
Haba ai jingkren na ki nongïalam ka Kynhun ki Sengbhalang jong ka Mawsynram C&RD Block (KSMC&RDB) ba watla ha ki por ba lyngkot na ki daw bym lah kiar ba kim shah ïa ka Kynhun ki Sengbhalang ban ïa kynduh ïa u Myntri Rangbah ka Jylla, u Conrad Sangma ha katei ka jingïalang hynrei ki la ïoh lad ban ai ïa ka Dorkhas ha shiteng lynti kum ki Kynhun Sengbhalang ki kren shai ba ym ba kane ka jingdawa jong ki ban kyntiew kyrdan ïa ka C&RD Block Mawsynram sha ka Civil Sub Division ka dei tang na ka bynta ki Sengbhalang ne ban leh politik hynrei kane ka dei ka dawbah bad ka jingdawa jong u paidbah.
