Shillong, Jylliew, 14: Ki nongtrei jong ka Mawmluh Cherra Cement Limited (MCCL) kiba don hapoh jong ka lama jong ka Mawmluh Cherra Cement Employees Union (MCCEU) ha ka sngi Baar ki la wan kiew Shillong ban pynlong ïa ka jingïakhih kaba khlem pud sngi hakhmat ka Head Ophis ban na ka Sorkar ban siew noh ïa ka tulop kaba manla u bnai.
Kane kam dei shuh ka sien kaba nyngkong hynrei ki nongtrei jong ka MCCL ki la pynlong teng ïa ki jingïakhih ha ki snem kiba ladep hadien ba ka jingsiew tulop kam shym la long shuh kum ha ki snem kiba mynshwa mynba ka karkhana ka dang lah ban pynmih tista ïa ka dewbilat.
U President ka MCCEU, u Bah Shanlang Diengdoh ha ka jingïakren bad ki lad pathai khubor u la ong ba ka jingïakhih kaba la pynlong ka dei namarba ka Sorkar kam shym la jubab ïa ka jingthoh kaba ka Union ka la ai la katto katne bnai.
“Ka jingdawa ka long ba ka Sorkar Jylla kan siew noh da ka tulop kaba manla u bnai sha ki nongtrei namarba ki la poi sha ka khim khait na ka jingbym ïoh tulop manla u bnai,” u la ong.
“Ka Sorkar ka dei ban pyntreikam biang ïa ka Voluntary Retirement Scheme (VRS) khnang ba ki nongtrei kiba la kwah ban shim ïa kane ka jingshongthait ba khlem pat dei por kin ïoh ïa ka lad kumba la leh ïa ki 150 ngut ki nongtrei jong ka Karkhana mynshuwa namarba ki don ki nongtrei kiba kwah ban shongthait na ka kam kaba ki trei,” u la ong.
Ka MCCEU ka la kyntu ïa ka Sorkar ba kan pyntreikam noh ïa ka Karkhana la ka long ha kano kano ka rukom ba ki nongtrei kin ïoh trei biang bad ba ki nongtrei kin ïoh ïa ka tulop kaba manla u bnai da kaba pynbha ïa ka katkum ka juk kaba mynta.
Ka Sorkar ka la pyntip ba yn sa pynim ïa kane ka karkhana lyngba ka Joint Venture hynrei kane ka kam ka dang sahteng haduh mynta la kumba katto katne snem.
