Shillong, Naitung, 15: Ka jingbym pyllait pisa jong ka Sorkar la san bnai kynthih, kata, naduh u bnai Rymphang haduh u bnai Jyllïew, 2022 ka la pynsuhsat bad buh jingeh ïa ki 12,451 hajar ngut ki nonghikai skul SSA kiba la shu im khlem ka tulop nalor ba ki hap ban pyndap pynbiang ïa ka iing ka sem.
Ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSASTA) ki la sdang ïa ka jingïakhih da kaba shong kyllaiñ myngngor ha Parking Lot, hajan ka ophis Additional Secretariat, Shillong ha ka sngi Thohdieng.
“Ngin sa bteng ïa ka jingïakhih kaba khlem pud sngi naduh ka sngi Balang jong ka taïew ban sa wan lada ka jingïakren bad u Bah Donald P. Wahlang u Addl. Chief Secrety ka Jylla uba peit ïa ka tnat Pule Puthi kam long kaba seisoh,” ong u President ka AMSSASTA ha ka jingïakren bad u nongthoh khubor.
Haba kylli, u la ïathuh ba ka jingdawa jong ka AMSSASTA na ka Sorkar ka la long ban pyllait noh ïa ka tulop kaba san bnai bad ban pyllait ïa ka Arrear kaba hynrïew bnai.
Ha kane hi ka sngi, u Secretary jong ka tnat Pule Puthi ka Sorkar Jylla u Bah R. Rapthap u la khot ïakren ïa ki nongïalam jong ka AMSSASTA bad ïa ki nongïalam jong ka Meghalaya SSA School Association (MSSASA) halor ka jingbym pat lah ban pyllait jong ka Sorkar Jylla ïa ka tulop kaba san bnai sha ki nonghikai skul SSA.
“Ha ka jingïakren u Secretary jong ka tnat Pule Puthi u la pan por sa ar taïew ban ap ïa ka pisa kaba wan na ka Sorkar Pdeng khnang ba yn dup lah ban sïew shwa ïa ka tulop tang na ka bynta u bnai Ïaiong, Jymmang bad Jyllïew, 2022. Kata ruh kam thikna bad ka shong ha ka jingdap jong ka pisa bad lada ka pisa ka dap tang ar bnai ruh yn sïew tang ar bnai bad lada ka pisa ka dap lai bnai ruh yn sïew tang lai bnai,” la ïathuh u President jong ka MSSASA u Bah Aristotle Rymbai ha ka jingïakren bad ki lad pathai khubor.
“Katba ka tulop jong ka Financial Year 2021-22, u Secretary u la ïathuh ba ka pisa ka dang sahkut hapoh ka Finance Department bad kam pat don kano kano ka dak ban pyllait ïa ka pisa na ka bynta ban sïew ïa ka tulop jong u bnai Rymphang bad u bnai Lber,” u la bynrap.
Ha kaba ïadei bad ka jingdawa ban pynkïew tulop bad ka jingdawa ban pynkynriah noh ïa ki 12,451 ngut ki nonghikai SSA sha ka tnat Pule Puthi, u Bah Rymbai, u la ïathuh ba u Secretary ka tnat Pule Puthi u la ïathuh ba ka Sorkar ka shong pyrkhat halor kane ka jingdawa.
“Ngi pynbna ba ngin ïaid beit shakhmat ïa ka jingïakhih kaba khlem pud sngi ka ban sdang naduh ka 18 tarik mynta u bnai ha Parking Lot, hajan ka ophis Additional Secretariat, Shillong,” la pyntip u Bah Rymbai.
Katkum ka jingïathuh jong une u nongïalam ka MSSASA, bun ngut ki nonghikai skul SSA kiba la im hapdeng ka sohsat naba kim don pisa wat tang shi naïa ruh wat ban leit shim dawa haba ki khun ki kti ki pang ki shitom.
“Ngi sngew synei ïa ki nonghikai jong ngi namarba ki hap ban mad ïa kine ki jingeh. Ngi dawa ïa ka Sorkar ba ka dei ban pyllait noh mardor ïa ka tulop. Haduh hynrïew bnai ban im khlem ka tulop kam dei kaba suk namarba ngi ruh ngi dei ki briew bad ki don shibun ki jingdonkam ha ing hasem. Ka jingpynslem jong ka Sorkar ïa ka tulop ka long kumba pynshitom beiñ ïa ki nonghikai, khamtam ïa ngi ki nonghikai skul SSA,” la kren diaw une u nongïalam ka MSSASA.
