Nongpoh, Naitung, 12: Ka Khasi Student Union, Nongpoh Circle mynta ka sngi ka la pynpaw ïa ka jingbym hun satia halor ka jingwan khynra trading license ka kynhun Enforcement ka KHADC ha sor Nongpoh, kaba dei halor ka nongrim ba dei ka seng kaba la ujor sha ka KHADC lyngba u EM ka trade bad enforcement ban pynlong ïa ka jingkhynra trading license bad haba wan ban khynra ïa kane ka trading license pat ka KHADC kam shym la pyntip satia ïa ki nongïalam ka seng.
Kane ka jingpynpaw ka KSU Nongpoh Circle ba kam hun satia halor kane ka jingwan khynra trading license ka kynhun enforcement ka KHADC, ka dei hadien ba ka seng mynta ka sngi ka la ïoh jingtip ba kitei ki kynhun ki la pynlong ïa ka jingkhynra ïa ka trading license, hynrei kim shym la pyntip satia ïa ki nongïalam ka seng haba ki la sdang ban pynlong ïa kane ka jingkhynra ïa ka trading license.
Haba ïa kren bad ki Nongthoh Khubor mynta ka sngi, u President ka KSU Nongpoh Circle, u Samla John Lyngdoh, u la ong ba ka seng ka sngewkhia halor kane ka jingwan khynra trading license ka KHADC lyngba ka enforcement team, ka dei namar ba dei ka seng kaba la ujor sha ka kHADC ban pynlong ïa kane ka jingkhynra trading license, hynrei ha ka por ba ki wan ban khynra pat kim shym la pyntip sha ka seng bad ruh ïa ka shithi ki la phah sha ka seng ban pynlong ïa kane ka jingkhynra katba ha ka por ba ki khynra pat kim shym la pyntip satia sha ka seng.
U la ong ruh ha ka jingshisha ka seng ka la ïaid da ka lynti ban pyntip sha ki bor ba dei peit ban leh ïa kane ka kam halor ka jingwan poi bun ki bar jylla kiba wan khaïi pateng ha Nongpoh khlem da don ki kot ki sla ne ïoh bor da ki bor ba dei peit, hynrei kaba sngewsih ka long ba kim lah wat ban pyntip lang sha ka seng khnang ban long kaba ïaid beit ïaid rynti ha kaba ïa kane ka kam ruh dei ba la lamkhmat da ka seng KSU Nongpoh Circle.
“Halor kane ka jingleh lyndet ka KHADC lyngba ki Enforcement team khlem da pyntip lang sha ka seng, ka KSU kam hun satia bad kum ka seng kam banse ban pynlong noh hi da ka jingkhynra paidbah da ka seng ïa baroh ki dukan bar jylla ha Nongpoh, namar kum ka seng ka sngewkhia haba la ïaid lyngba ka lynti ban pyntip sha ki bor ba dei peit, hynrei ka KHADC kam shym la burom ïa kane ka kam ba la lamkhmat da ka seng” ong u Samla John Lyngdoh.
U la ong ruh ba ka seng ka sngewkhia ïa kane ka kam ban ujor sha ka KHADC ban pynlong ïa ka jingkhynra trading license ka dei namar ba kam kwah ban shim ïa ka aiñ ha ka kti bad ka seng ka ujor ruh sha ka KHADC ka dei namar ba kum ka seng ka la ïoh jingtip ba don shibun ki dukan ki bar jylla kiba khlem da don trading license ha kaba ki la shu pynïaid ïa ki dukan tang da ka NOC u Rangbah shnong bad lada long ha kane ka rukom ka seng kam banse ban ïaid la ka jong ka lynti ban pynlong hi ïa ka jingkhynra trading license bad ruh wat ïa ka labor license ha sor Nongpoh khnang ban lah ban khanglad ïa kine ki kam khaïi pateng ki bar jylla kiba khlem da don ki kot ki sla ne ki license ba la ai bor da ki bor ba dei peit katkum ïa kine ki kam, u la bynrap.
