Nongpoh, Nailur 07: Ka jingkhmih lynti ki paidbah ka thaiñ Nongpoh ban ioh ïa kata ka Jingkieng ïaid Kjat (Foot Over Bridge) kam pat urlong satia haduh kine ki sngi bad bunsien ki khynnah skul bad ki paidbah ki hap ban ïaid na ka surok bah kaba la don ruh ka jingma haba ki jam na shiliang sha shiliang ka surok bah.
Kum ban pynkynmaw, kane ka jingdawa ban tei ïa katei ka jingkieng ïaid kjat ha Nongpoh ka dei kawei na ka mat ba la ju ïa kren na ka por sha ka por bad la ju dawa ruh naduh ki bor pynïaid shnong bad ki paidbah na ka bynta ka jingshngaiñ ki paidbah ha ka leit ka wan kaba ki hap ban jam na ka surok bah kaba don jingma ïa ka leit ka wan ki paidbah.
Haba kren halor kane ka Jingkieng ïaid kjat, ka la donkam shisha ban don noh ha Nongpoh ban pynsuk ïa ki paidbah ha ka leit ka wan ban jam ïa ka surokbah bad ïa kane ka surok la ju pyndonkam ym tang ki paidbah ka thaiñ Nongpoh, hynrei kaba donkam bha na ka bynta ki khynnah skul ha kaba ki khynnah skul na ka skul St. Paul Higher Secondary School, ka Morning Secondary School bad kynthup kiwei kiwei ki skul, ha kaba tang shu dei ka por wai skul katei ka surok la khapngiah da ki khynnah skul bad teng ka don ka jingma na ka bynta ki khynnah skul ban jam ïa kane ka surok kaba ju khapngiah da ki kali paidbah ba ïaid lyngba kane ka surok.
Halor kane ka Jingkieng ïaid kjat, ha ki snem ba la leit noh na ka por sha ka por la ju ïa kren bad ka National Highway Authority of India (NHAI) ba ka dei ban tei noh ïa katei ka Jingkieng, ha kaba la shim khia naduh ka Nongpoh Town Committee, u MLA ka Nongpoh bad kynthup ruh wat ka bor synshar District, hynrei kumba long haduh mynta kim pat don kino kino ki dak ki shin ba ka NHAI kan sdang ban tei ïa katei ka jingkieng khlem da ïa kren kiwei kiwei ki jingduna kiba dang don hadien ba la pynheh ïa kane ka surok 4-lane ha Ri Bhoi.
Kumba la lap bad sakhi da u Nongthoh Khubor, kane ka Jingkieng ïaid kjat ka dei shisha kaba la donkam bha ban tei ha Nongpoh, namar la ka dei ha ka por mynstep, ka por mynsngi bad ka por janmiet, kane ka surok ka ju khapngiah namar ba bun ki nongleit nongwan khamtam ki khynnah skul bad la jin ba kane ka Jingkieng Ïaid kjat ka la don ha Nongpoh ki paidbah kim donkam shuh ban jam ïa ka surok lyngba kane ka surok bah kaba don jingma namar ka jingbun ki kali paidbah bad ki paidbah ki la lah ban ïaid noh na katei ka jingkieng ïaid kjat kaba la tip ruh ha ka ktien Nongwei kum kata ka Fly Over Bridge.
