Bym don doktor ha ka sngi Saitjaiñ bad Sngi U Blei, jurip ka HANM ïa ka Mawthawpdah PHC

Mawkyrwat, Risaw, 17: Ki nongïalam ka Hynniewtrep Achik National Movement (HANM) Mawsaw Unit da ka jingsngewkhia bad jingkitkhlieh na ka bynta ki paidbah jong ka thaiñ ha ka sngi Palei ki la leit ban jurip ïa ka Mawthawpdah Primary Health Centre (PHC), South West Khasi Hills District.
Ïa ka jingjurip jong ki dkhot ka HANM la lamkhmat da u President u Bah Banshan Ïawphniaw bad u Secretary ka seng u Bah Exlandar Thongni.
Kane ka jingleit jurip jong ka seng, ka long hadien ba ka la ïoh jingujor na ki paidbah jong ka thaiñ halor ka jingbym don ki doktor ha ka sngi Saitjaiñ bad ka Sngi U Blei, kaba la pynsohsat ïa ki nongpang kiba leit wad jingsumar ha kitei ki sngi.
Ki nongïalam ka seng ki la ïoh ban ïa kynduh ïa u doktor ba dei peit ïa ka PHC, uba la pynpaw ba ha ka jaka sumar don tang iwei u doktor MBBS bad iwei i doktor Ayush, bad halor kane ki shem jingeh shibun ban pyndep ïa ka jingai jingshakri ha ka jingïadei bad ka jingbun ki nongpang.
Ka seng ka la dawa ïa ka sorkar ba kan shimkhia mardor ban buh sa iwei ne ar ngut ki doktor MBBS ha ka PHC Mawthawpdah, na ka bynta ban pynthikna ba ki paidbah kin ïoh jingsumar kaba biang ha manla ka sngi.