Bym don bai kali ki khynnah ban leit phai ïing sha Manipur, ïarap kyrshan ka FKJGP da ka pisa

Nongpoh, K’Lyngkot 29: Kum kawei naki kam ba bha sha ki briew ba donkam ka jingïarap ka seng Federation of Khasi Jaintia and Garo People (FKJGP), Baridua Circle mynta ka sngi kala kyrshan da ka pisa sha kumba 10 ngut ki khynnah skul na Manipur ki bym don wat tang ka bai kali ban leit phai shala iing kiba dang pule ha Savio Higher Secondary School, Baridua bad kiba sah bad ki sister jong ka SMMI ha St. Mary’s Boarding.
Hadien ka jingioh jingtip ba kitei ki khynnah ki don hapdeng ka jingeh kaba khraw ban leit phai shala iing naka liang ka seng mynta ka sngi hapoh ka jingïalam u Samla Denis Nongrum President haka jingdonlang u Samla Alan Donald Sopdang General Secretary, u Samla Micky Lyndem Vice President lem bad ki dkhot kila leit ban ha katei ka jaka sah ba peit bad khmih da ki sister ban ïakynduh bad ki bor pyniaid khnang ba kitei ki khynnah skul kin ioh ban leit phai iing ban ïakynduh bad ki bahaiing hasem.
Naka liang ki nongïalam ka seng kila ïathuh ba hadien ka jingpyntip jong ki sister ba ki don ki khynnah kiba shem jingeh ha kaba ïadei bad ka pisa ban leit phai shala iing, kum ka seng kala shimkhia ban leit peit leit khmih sha katei ka jaka sah jong ki bad ban noh synñiang katba lah ka bor khnang ba kitei ki khynnah kin ioh leit phai shala iing ryngkat ki jingbam.
Kum ka seng kala phah buh da ka jinduwai kyrpang ba kum ki nongïalam kin dang lah ban shakri bad ban leh ki kam babha sha ka imlang ka sahlang bad kyrpad ruh ïaki sister kiba peit bad khmih ha katei ka jaka lada ki donkam kano kano ka jingïarap kum ka seng ka kloi ban don bynta katba lah ka bor watla ka dei da ka bor met ne kano kano kaba ki lah ban ïarap.