Bym don ba kyrshan ym ïoh ïatai u Bah Adelbert halor ka Roster System

Shillong, Nailur 16: Ka Adjournment Motion ba la wanrah da u MLA ka North Shillong halor ka jingktah ka Roster System ha ka Reservation Policy kam shym la poi shaduh ka bynta ban ïatai ha ïingdorbar na ka daw ba kam shym la ïoh jingkyrshan na ki dkhot jong ka ïing.
Katkum ka rukom pynïaid ïingdorbar, ka Adjourment Motion kadei ban ïoh ïa ka jingkyrshan na ki 10 ngut ki dkhot kaba mut ki MLA hapoh ïingdorbar khnang ban ïoh ban ïatai. Hynrei mynta ka sngi halor kane ka Motion jong u Bah Nongrum ym shym la don mano kano ruh ba ai jingkyrshan bad kumta u Shongknor, u Bah Metbah Lyngdoh, u la pynkut noh namar ba ka rukom pynïaid ïingdorbar kam shah.
Ha shuwa jong kane, u Bah Metbah, mar syndep ka ka kynta buh jingkylli, u la pyntip ba u la ïoh ïaka jingthoh na u Bah Adelbert ban wanrah ïa ka Adjournment Motion bad namar ba u MLA ka North Shillong u la wanrah ruh da ka Resolution halor kajuh ka mat, hynrei um shym la ïoh ban ïakren hapoh ïingdorbar, kumta u la shah ïa u Bah Nongrum ban wanrah ïa kane ka Motion, tangba ki kyndon pynïaid ïingdorbar kim shah pat ban ïatai, hynrei ka ailad ïa u nongwanrah ïa kane ka motion tang ban shu batai lyngkot halor ka mat ba u wanrah bad hadien kata pat hap ban pan bor ïa ka ïingdorbar. Lada don 10 ngut ki dkhot ba kyrshan lah ban ïatai, hynrei lada duna na kata ym lah satia ban ïatai.
Haba batai lyngkot halor kane ka mat, u Bah Adelbert u la ong ba ka kyntien Roster System ka la pynkyndit ïa kiba bun ki Samla ba wad kam, lyngba ka hukum jong ka High Court of Meghalaya ha u bnau ïaïong mynta ka snem. Nangta ki artylli ki jingjia ha u bnai Jymmang bad Jylliew, kata ka Office Memorandum jong ka Personel Department kaba ong ban pynneh ïa ka Reservation da ka Roster System bad kaba ar pat kadei ka jingpynbna laitkam kaba ka jingpynbna ka thungkam ka noh shiliang ka tarajur tang sha kawei ka kynhun jaidbynriew.
Kane ka jingsheptieng jong ki samla wadkam ka la nang jur namar ka Roster System ka ïarap ïa kawei ka kynhun jaidbynriew bad pynduh lad ïa kawei pat ka kynhun jaidbynriew. “Ngam pyrshah ne ïashah sha kano kano ka kynhun jaidbynriew, hynrei kum ka jylla ngi dei ban don ka jingïaryngkat lang baroh”, u la ong.
Shuh ha kane ka jingbatai lyngkot, u Bah Adelbert u la ong ba kum u nongmihkhmat kadei ka kamram jong u ban peit ba ki Samla ba wadkam kiba la biang ka jingpule kim dei ban shah leh shiliang khmat tang na ka daw jong ka Roster System. Kumta u la kyntu ba dei ban don ka jingphai dien ne ka jingpynbeit thymmai ïa ka Roster System.