Shillong, Lber 09 : U MP barim ka Rajya Sabha ba dei ruh u MLA ba mynta jong ka North Tura, u Thomas A Sangma u la jop suk ïa ka shuki Lamphang jong ka Ïing Dorbar Thawaiñ ka jylla hadien ba ym shym la don mano mano ruh ba aireng pyrshah.
Ka jingjop jong u Thomas kadei hadien ba lai tylil ki party ba don ha ka Liang Pyrshah ba kynthup naduh ka Congress, TMC bad Voice of the People’s Party kim shym la pynieng kyrtong.
Ha kane ka sngi na ka liang u Lamphang ba shipor (Protem Speaker) uba pynïaid ïa ka Dorbar u la ong, “Naba ka ophis jong ka Ïing Dorbar ka la ïoh pdiang tang kawei ka kyrteng, kumta nga pynbna ïa u Thomas A Sangma kum u Lamphang.”
Na ka liang u Lamphang ba thymmai ha ka jingkren u la ai ka jingkhublei ïa baroh ki dkhot jong ka Ïing kiba la jied da kawei ka sur ïa u ban shimti ïa katei ka shuki. “Da ka jingsngew burom nga shimti ïa kane ka shuki kum u Lamphang. Nga pynpaw ruh ka jingsngewnguh ïa baroh ki dkhot jong kane ka Ïing kaba donburom kiba la ibit ïanga ban shim ïa kane ka kam,” u la ong.
Da kaba pynpaw ba ka Ïing Dorbar Thawaiñ jong ka Jylla ka la paw kum kawei na ki Ïing long Dorbar kaba donburom tam ha ka Ri, u Lamphang u la ong ruh, “Nga tikna ba ngin bteng ïa kane ka burom.” Shuh shuh u ong ruh ba un ailad ïa ka jingïatai kaba shongnia kaban sei pat ïa ki polisi bad ki aiñ kiban pynmyntoi. U ong ruh ba u khmih lynti ba ki dkhot jong ka Ïing Dorbar ruh ba kin ïatai da ka jingshemphang bad ruh da kaba burom lang pat mar kylliang.
Ha shwa kane, la ïoh ruh ïa ka jingkren na u Myntri Rangbah ka jylla, Conrad K Sangma uba la pynpaw ïa ka jingsngewskhem ba utei u MP barim ka jylla un pyni ïa ka jingtbit jong u ha katei ka shuki.
“Da ka jingtbit kaba phi la don, nga tikna baphin lah ban ai ïa kaba bha tam ha ka shuki Lamphang ba phi don,”u la ong.
Ha kane ka sngi la ïoh ruh ka jingkren na baroh ki Lamphang kiba rim kynthup naduh u Bah Charles Pyngrope, Bah Metbah Lyngdoh, AT Mondal, kumjuh ruh na ki MLA bad Myntri Sorkar kiba baroh ki la ai ka jingkitbok ïa utei u Lamphang ba thymmai
