Bym burom ïa ka ‘Thomas Jones Day’, leit khang ka FKJGP ïa ki ophis ha Mawsynram

Mawkyrwat, Jylliew, 22: Ka Federation of Khasi Jaiñtia & Garo Peoples (FKJGP) jong ka South East Khasi Border Circle mynta ka sngi da ka mynsiem jong ka jingsngewkitram bad don jingkitkhlieh ïa sngi burom jong u uwei na ki ‘riew khraw u Thomas Junes, ka la leit ban phah khang ïa ki ophis treikam kiba don hapoh Mawsynram C&RD Block.
Ha ka khubor na u President jong ka FKJGP, South East Khasi Border Circle, u bah Kyrmen Shangdiar u la ong ba ka jingleit phah khang jong ka seng ïa ki ophis treikam kiba hapoh ka Mawsynram Block ki long kynthup ka State Bank of India (SBI), ka Post office, ka Meghalaya Co-operative Apex Bank (MCAB) bad ka FEDCO Ltd., Office bad ka jingphah khang jong ka seng ïa kine ki ophis treikam ka long namar ka jingbym burom jong ki ïa ka sngi kyrpang u Thomas Jones Day.
Shuh shuh u la ong bad pynpaw ba ïa ka ophis treikam jong ka FEDCO Ltd., kaba ka seng naduh ki snem ba la dep shwa ban shimti kane ka company ïa ka kam bording ka la pyrshang ban khanglad namar kam kwah ban ai sha ki company hynrei mynta haba ki nongtrei ki dei ki khasi pynban kim shym la burom lem ïa kaei ba ka jaidbynriew ka don bad burom ïa ki briew kiba la noh synñiang sha ka jaitbynriew.
Namarkata, u la kyntu ruh ïa ka sorkar bad ki bor ba halor ba nangne shakhmat ki dei ban ai jingtip sha baroh ki tnad trei kam ba ki dei ban burom ïa ka sngi kyrpang une u ‘riew khraw uba ka jaidbynriew ka tip ïa u kum u kpa ki dak thoh khasi lane Father of the Khasi Alphabet. Ha kajuh ka por la kyrpad ïa ki jaka pynlang pisa (bank) lane ophis treikam ba nangne shakhmat kim dei shuh ban dang ïai leh bym suidñiew ïa kaei ba ka Jaidbynriew Hynñiewtrep ka leh bad burom kyrpang ïa kane ka sngi.