Mawkyrwat, Jylliew 06: Ki ar tylli shnong kiba hap hapoh jong ka South West Khasi Hills District ha kine ki sngi ki la mad ïa shibun ki jingeh ha kaba ïa dei bad ka jingpoi jong ka umbam umdih lyngba ki pipe ba la buh ha ki jaka pyllait um ne platform na ka daw jong ka jingbym biang ki pipe pyntuid um.
Ki ar tylli ki shnong kiba kynthup ïa ka shnong Manad bad ka shnong Mawbidong, kiba hap hapoh jong ka South West Khasi Hills District ha kaba ïa dei bad kane ka jingeh ki la dep ban pynsngew hapoh ka ophis jong u PHE Mawkyrwat Division hynrei haduh mynta ym pat shym la leh ei ei watla la dep ban pyntip ruh.
Katkum ka tyllong khubor na ki ar tylli ki shnong kata ka shnong Manad bad ka shnong Mawbidong la ong ba naduh ba sdang ba wan jurip ne survey da ki nongtrei jong ka ophis u PHE Mawkyrwat Division na ka bynta ban phah submit ïa ka skhim umbam lyngba ka Jal Jeevan Mission (JJM) ha kaba halor kane ka bynta la ïathuh ba na baroh ar tylli ki shnong ki la dep ban pynbiang lut naduh ki jaka kata naduh ki trai khyndew ban shna ki tlong-um (source lane headwork) ha ryngkat ka jingïaid ki pipe line.
Hynrei hadien ba la ïoh ïa ka mang na ka bynta ka skhim JJM lyngba ka Phase-I, la ong ba kine ki ar tylli ki shnong ki ïoh pynban tang ka ‘retrofitting’ ïa ki pipe hapoh shnong ban pynpoi pipe ha baroh ki rympei ïing bad kane ka daw kaba wanrah jingeh ïa ki longïing hapoh ki shnong namar ki khlem ïoh ïa ka jingmang ne sanction ban shna pynheh naduh tlong-um haduh hapoh shnong. Kine ki pipe jong ka tyllong katkum ka jingïoh jingtip la ong ba ki lah ban kyrshan tang 10 tylli ki platform (jaka ai um bad la ïadih lang bun tylli ki ïing) hynrei mynta pat la shna ban pynpoi pipe haduh 121 tylli namar ki ïing tang ha shnong Mawbidong bad ïa ka shnong Manad pat la pynïar haduh 145 tylli na ka 10 tylli ei ei ki jaka pyllait um.
Kumta na ka liang kine ki shnong hadien ba la don ka jingpynkylla, ki la leit ïa kynduh ïa ki nongtrei ka ophis PHE Mawkyrwat Division hynrei na ophis ki ong pynban ba kan shem jingeh ban ïoh skhim ïa ki shnong ba la pyntrei ka skhim JJM bad ha ka juh ka por ki ong ba kin phah ïa ka bynta ban pynbha bad ïa kane ka main-line pat ka shong sa tang ha ka sorkar ba kan mang da kawei pat.
Namarkata, halor kine jingeh ki nongkitkam jong ki ar tylli ki shnong ka Manad bad ka Mawbidong kin ïai buh ïa ka jingkyrpad ïa ka sorkar ba kan shimkhia lem ïa kane ka jingeh jong ki paidbah bad ha kajuh ka por ki buh ka jingkyrpad ïa u bah Renikton Lyngdoh Tongkhar uba dei u Myntri ka PHE jong ka Sorkar Meghalaya bad kum u MLA jong ka thaiñ ba un ïarap ban thaw lad lem ban mang pisa na ka bynta kane ka jingeh kaba kine ki ar tylli ki shnong ki ïa kynduh mar ïa pyntrei ïa ka skhim umbam umdih da ka Jal Jeevan Mission (JJM).
