Bym aiti u Syiem barim ïa u shabi, pynpra ïa ka tala jong ka ophis Syiem Nobosohphoh

Mawkyrwat, K’lyngkot, 07: U Acting Chief jong ka Nobosohphoh Bah Ferdinand Syiemiong uba u la shah jied ban pynïaid shipor ïa ka hima hadien ba ka Khasi Hills Autonomous District Council (KHADC) ka la sonpon ïa u Syiem barim u Pa’iem Kawangbor Syiemiong, u la lum lang ïa ki Sordar jong ki shnong hap hapoh ka Hima Nobosohphoh Syiemship kumjuh ruh ki Lyngdoh ban pynlong ïa ka jingïalang ha phyllaw jong ka ophis syiem.
Kane ka jingïalang ba la lum da u Acting Chief ka long ruh ban plie noh ïa ka tala jong ka ophis syiem kaba dei ka ophis treikam jong ka Hima Nobosohphoh ha ryngkat ka jingdonlang ki briew na ka ophis u Deputy Commissioner ka South West Khasi Hills District u bah I. lawrynniang, Block Development Officer ka Mawkyrwat C&RD Block ban sakhi ïa ka jingplie ïa ka ophis syiem.
Ka daw ba la pynlong ïa ka jingïadonlang da ki briew jong ka ophis jong u DC South West Khasi Hills District ka dei hadien ba ka Excutive Committee jong ka KHADC ka la sospon ïa u Syiem barim u Pa’iem Kawangbor Syiemiong katkum ka Section 11 jong ka aiñ The Khasi Jaiñtia Autonomous District (Appointment and Succession of Chief and Headmen) Act, 1959 bad kaba la thung ïa u Acting Chief jong ka Nobosohphoh ban pynïaid shipor ïa ka hima. Hynrei namarba u Syiem barim um shym la aiti noh ïa ki kot ki sla kumjuh ruh ïa u shabi jong ka ophis kumta la hap ban shu pynra jubor noh ïa ka tala jong ka ophis syiem, lyngba ka jingmynjurlang ki sordar ki Lyngdoh.
Hadien ba la pynpra ïa ka tala ba la sakhi lang da u BDO lem bad katto katne ki rangbah ki la rung ban peit ïa ki kot donkam jong ka hima bad hadien kata ki la pynlong ïa ka jingjied ïa ki dkhot bathymmai jong ka Executive Committee ban pynïaid ïa ka hima bad la pynkup burom ruh na ka ïing ka sem ïa u Acting Chief kum u Syiem khynnah jong ka Hima Nobosohphoh.