Burom ïa i Kong Mavis kum ka longkmie ba nyngkong ban long myntri sorkar ha ka ri : Metbah

Shillong, Nailur 19 : U Lamphang ka ïing Dorbar Thawaiñ ka jylla u bah Metbah Lyngdoh mynta ka sngi ula kyntu ïa ka sorkar ban burom ïa I Kong Mavis Dunn Lyngdoh khnang ban pynsah kynmaw ïa kane ka jingrakhe dap 50 snem ka jylla namar I dei I Longkmie ba nyngkong eh haka ri India baroh kawei ban shimti ïa ka kam Myntri Sorkar, da kaba shna ïa u mawmot uba shirynieng jongi ha kane ka nongbah Shillong.
“Nga kyrpad ïa ka sorkar ban pdiang ïa kane bad shna ïa u mawmot ba shi rynieng jongi Kong Mavis Dunn Lyngdoh ( bam kwai ha dwar U Blei) ha phyllaw ka State Central Library kum ka jingburom ïa ka jingshakri ba i la noh synniang sha ki paidbah” ong u bah Metbah.
Haba ïaroh ïa ka jingpyrshang ka sorkar ban rakhe ïa kane ka jingdap san phew snem haka jingiphuh iphieng u la ong kane ruh kan long kawei ka prokram sah jingkynmaw ïa i kong Mevis kum ka longkmie ba nyngkong eh ha ka ri India baroh kawei ban shimti ïa ka kyrdan Myntri Sorkar ha ka sorkar Assam.
I la ïadon bynta ha ka saiñ pyrthei naduh u 1937 haba i la shah jied kum ka MLA jongka Assam Legislative Assembly kum i kyrtong shimet bad i long ruh ka longkmie ba nyngkong ha ka rta ba 33 snem ban shimti ïa kane ka shuki.
La kha ïa i ha ka 4 tarik Jylliew 1906 bad i dei i khun jong i H.Dunn bad kong Helibon Lyngdoh. U para jong u kpa jong i u Edward W Dunn u dei u dkhot jongka British Empire kum ka jingburom ba u dei u Civil Engineering. I pule ha ka Welsh Mission Girls School, Shillong bad nangta ha Diocesan College bad Bethune College Kolkata bad i la pyndep ïaka BT Degree.
Dei ha ka por ba i don ha Kolkata ba i la ïa kynduh ïa u Mahatma Gandhi. I dei ruh ka Khasi ba nyngkong ban pyndep ïa ka jingpule Law na University Law College, Guwahati.
Dei ha u snem 1939 ba u Sir Mohammed Syed Saadulla u la khot ïatrei lang ia i ha ka sorkar jongu bad ai ïa ka shuki Myntri sorkar ha i. I la peit ïa ka tnad ka koit ka khiah. I la plie ïa ki kam nurse ha ki hopital sorkar sha baroh kito kiba la dep pyntbit la ka long ha kano kano ka rukom ruh. Kane ka la ai jingmyntoi bha ïa kane ka thaiñ namar ha kato ka bor ym don Training School ïa ka kam Nurse.
I la shah rem noh ha u snem 1946 bad sangeh syndon na ka kam saiñ pyrthei bad phai pat sha ki kam trei mon sngewbha. I la ïadon bynta ruh bad ka sorkar Assam kum ka nongaibuit hadien ba la ïoh ïa ka jinglaitluid. Ha ki sngi ba khatduh jongi i la leit shangkai sha ki ri Sepngi bad ai ki jingkren ha US bad UK. I long iba jrong ha ka rynieng bad ka dur ba bha briew bad iba iar jingmut jingpyrkhat bha. I khlem shongkurim bad i long ruh i khasi ba nyngkong eh ban ñiah kali.