Bunsien ki briew ki sngewthuh ïa ka dor jingkoit jingkhiah ynda ki la kem pang: Metbah

Mairang, Ïaiong 22: Kum shibynta jong ka jingrakhe ïa ka jingdap saw snem jong ki Ayushman Bharat Health and Wellness Centre hapoh ka jylla Meghalaya, kaba long shibynta na ka jingrakhe ïa ka Azadi Ka Amrit Mahotsav, ka ophis u Deputy Commissioner ka Eastern West Khasi Hills District ha ryngkat ka jingïatreilang bad ka ophis jong ka Block Medical & Health Officer Mairang Block, mynta ka sngi ka la pynlong ïa ka Block Health Mela ha Madan Mot Tirot, Mairang Mission Mairang, ha kaba u Lamphang ka Ïing Dorbar Thawaiñ ka jylla u ba long ruh u MLA ka thaiñ, U Bah Metbah Lyngdoh u la leit kum u kongsan.
Kiwei kiba la ïa don ryngkat ki long u Syiem ka Hima Nongkhlaw, u Pa’iem P. M Syiemlieh, u Deputy Commissioner ka Eastern West Khasi Hills District u Bah W.Nongsiej, u Superintendent of Police ka District u Bah M.B Syiem, ki nongtrei jong ki tnat sorkar bapher bapher, ki nongïalam shnong, ki khynnah skul bad ki paidbah ka thaiñ.
Kum u kongsan, u Lamphang ka Ïing Dorbar Thaw aiñ ka jylla, u Bah Metbah Lyngdoh, haba kren halor ka jingrakhe ïa ka jingdap 75 snem jong ka Ri India bad ka jingdap 50 snem jong ka jylla Meghalaya, u la ong ba kane ka jingrakhe ka pynkynmaw ïa ka jinglenlade jong ki riew ïaleh laitluid ka Ri. U la ong ruh ba kane ka jingrakhe ka long ruh ka kabu ban phaidien halor ki kam pynroi kiba bun ba ngi la sakhi lyngba ki snem bad ki por ba la leit.
Haba kren halor ka Health Mela ïa kaba la pynlong kum shibynta na ka jingrakhe ka tnat ka koit ka khiah ïa ka Azadi Ka Amit Mahotsav, u Bah Metbah u la pynkynmaw ïa ki paidbah halor ka jingkordor jong ka jingkoit jingkhiah ha ka jingim kaba man ka sngi. U la ong ruh ba bunsien hi ki briew ki sngewthuh ïa ka dor jong ka jingkoit jingkhiah tad ynda haba ngi kem pang.
U Lamphang u la kyntu ruh ïa ki paidbah ba kin ym pynsepei ïa ki jingmyntoi ba ki ïoh na ki skhim sorkar kum ka MHIS, NFSA bad kiwei kiwei. U la ong ruh ba kin ïawer lem ïa kiwei pat ki bym pat pynïasoh ïalade bad ki skhim sorkar kiba kum kitei.
Ha kane ka Mela kaba shi sngi, la sakhi ïa ka jingdon jong ki stall kiba pher ba pher kiba kynthup ïa ka jaka ha kaba ki Doctor Specialist bapher bapher, ki ïoh ban peit bad ai dawai na ka bynta ki longkmie ba armet, ki khunlung, kiba pang bniat, kiba pang khmut, shkor bad ryndang bad kumta ter ter, ki jaka screening na ka bynta ka jingpang TB, shini, BP bad kiwei kiwei.
Nalor kine, la buh ruh ïa ka Adolescent Friendly Health Clinic, ka jaka pynrung kyrteng na ka bynta ka MHIS, PMMVY, ka jaka pynrung kyrteng na ka bynta bynta u Adhaar bad la don ruh ki jinghikai Yoga bad Zumba ïa ki khynnah skul bad ki riew paidbah.
Kiwei pat kiba la kren ha kane ka sngi ki kynthup ïa u Syiem ka Hima Nongkhlaw, u Pa’iem P. M Syiemlieh, u Deputy Commissioner ka Eastern West Khasi Hills District, u Bah W. Nongsiej, u Junior Specialist ba dei khmih ïa ka Eastern West Khasi Hills District u Dr. W. Sutnga bad I Block Medical Health Officer ka Mairang Block I Dr. P.E Hadia.