Nongstoiñ, Ïaïong 26: Ka jingïoh ïa ka jylla ba pura ha ka 21 tarik Kyllalyngkot 1972 ka la kynjoh mynta sanphew snem lai bnai bad saw sngi, hynrei namar ba ha ka 21 tarik Kyllalyngkot ki kyndon ba ka sorkar ka la buh na ka bynta ban ïada na ka jingsaphriang jong ka khlam Covid 19 ka sorkar ka la pynlong noh da ka jingrakhe lyngba ka Video online.
Na ka liang ki bor pynïaid District jong ka West Khasi Hills ruh kim shym la lah ban pynlong ïa ka jingrakhe kaba kyrpang da kaba khot lang ïa baroh ki paitbah ba kin wan ban ïashim bynta, hynrei la pynlong tang da ki ophisar bad ki nongtrei jong ki tnad treikam sorkar kiba don hapoh ka District ryngkat ki rangbah shnong ïa kaba la pynlong ha phyllaw jong ka ophis u Deputy Commssioner.
Pynban hadien ba ka sorkar ka la weng noh ïa baroh ki kyndon, mynta ka sngi hat majai ki bor pynïaid District ka West Khasi Hills ki la pynlong ïa katei ka jingrakhe ha madan New Nongstoiñ. Ha katei ka sngi la pynïaid ïa ka jingrakhe da u bah P.D.Sangma Deputy Commssioner ka West Khasi Hills ha kaba u bah Macmillan Byrsat MLA ka Nongstoiñ u la ïa don ryngkat kum u kongsan.
Nalorkata la ïadonlang ruh da baroh ki ophisar bad ki nongtrei na ki tnad treikam jong ka sorkar, ki nonghmihkhmat kiba rim, ki nonghikai, ki khynnah skul bad College ryngkat bad ki paitbah ki la wan ban ïashim bynta ha katei ka sngi.
Ha shuwa ban pynlong ïa katei ka jingrakhe ïa ka Jubili ksiar jong ka jingïoh ïa ka jylla ba pura, kum ka jingai bynta lang bad pynshlur ïa ki paitbah nongshong shnong, ki khynnah skul bad ki khynnah College ba kin ïoh lad ban ïashim bynta lang ki bor pynïaid District, ki la pynlong ïa ki prokram ba bun jait kum ka jingïakop thoh poitri ha ka ktien Khasi bad Phareng.
Nangta la pynlong ka jingïa mareh marathon, ka jingpyni nam ïa ki tiar tem tiar put tynrai, ki syntiew ki skud, bad ki mock drill, na ka bynta ban ai jinghikai ïa ki paitbah kumno ban ïarap ïa ki nongshong shnong lada jia ka jingshah lynshop ha ki bor ka mariang, kaba la pyni da ka tnad Meghalaya Home guard ha ryngkat ka jingïatreilang bad ka kynhun jong ki shipai na ka tnad National Disaster Response Force.
Ha kajuh ka por, ka jingrakhe ïa ka jubili ksiar ha kane ka madan ka la long kaba ishongkun bad kaba iphuh iphieng wat la ki paitbah kiba wan ban ïashim bynta ki kham duna ruh. Ha katei ka sngi ha shuwa ba ki riew rangbah kiba la khot sngewbha kin ai ka jingkren, u bah P.D.sangma Deputy Commssioner u la ai ïa ka jingkren lamphrang bad pynshai ruh ha kaba ïadei bad ka jingïaleh jong ki longshuwa ban pynïoh ïa ka jylla ba pura.
U la pynkynmaw ba ka sorkar India kam shym la ai ïa ka jylla ba pura ha kaba nyngkong, hynrei ka la ai shuwa da ka Autonomous State. Hynrei ki nongïalam kim shym la shongthait ban dawa ba ka sorkar India ka dei ban ai da ka jylla ba pura bad ha ka 21 tarik Kyllalyngkot 1972, ka Myntri rangbah duh ka Ri ka (L) Smt Indira Gandhi ka la wan sha Shillong bad ka la pynbna ba la ai ïa ka Meghalaya kum ka jylla ba pura.
U Pa’iem phylla Singh haba kren ha katei ka sngi u la pynkynmaw dei ki nongïalam kiba na West Khasi Hills ki bym shym la pdiang ïa ka Autonomous state bad ha ka jingïalam jong u (L) bah Hopingstone Lyngdoh, ka jingïakhih bad dawa ïa ka jylla ba pura ka la nang jur ha kaba ki nongïaleh hill state ryngkat ki paitbah la ïeng skhem ban dawa khlem kynran dien ryngkat ka jingpyrta “No Hill Sate No Rest”. Lyngba katei ka sur ba ki paitbah ryngkat ki nongïalam ki la pyrta la lah ban ïoh ïa ka jylla kaba pura bad dei ka West Khasi Hills kaba la pynmih bun tam ki nongïaleh hill state.
Ha kane ka sngi la pynbna ruh ïa ki kyrteng jong ki nongjop ha ki jingïamareh marathon bad ka jingthoh poetry bad la sam ruh ïa ki khusnam da u bah Macmillan Byrsat MLA ka Nongstoiñ u ba long u Kongsan bad kiwei pat ki riew rangbah. Hadien ba la sam ïa ki khusnam la ïoh ïa ka jingkren na u kongsan, u ba la ong ba naduh ba la ïoh ïa ka jingïaid lynti ba sanphew snem jong ka jylla, kiei kiei baroh ki la kylla lut la ka long ha ka roi ka par ba kynthup naduh ki lynti syngkieng, ki skul bad ka pule ka puthi, ka pyrkhat pyrdaiñ bad ha baroh ki liang.
U la ong ruh ba ka jingkylla kaba khraw tam ka dei ha kine ki saw snem mynta, namar kumba ka long ha ki sanphew snem mynshuwa, ki sorkar kiba la leit noh kawei hadien kawei pat kim shym la lah ban pynurlong ïa ka jingpynbeit ïa u pud u sam. Hynrei kane ka sorkar kaba mynta ka la shimkhia bad ka la lah ban pynbeit ïa ki hynriew tylli ki jaka ïa kajia pud bad ka Assam kata lai tylli ha West Khasi Hills bad lai tylli ha Ribhoi District.
Ha kajuh ka por u la ong ba ki la mih bun bah ki jingkynthoh ha kaba ïadei bad ka jingpynbeit pud bad ki don ruh ki jingdawa ban dei ban pynthymmai biang ïa ka soskular. Hynrei u la kren skhem da kaba ong ba ka sorkar kan ym phai dien shuh ban khyllie biang ïa ka soskular ba la dep ïa soi.
U la ong ruh ba ki paitbah ki la dei ban kmen namar na ki laiphew phra tylli ki shnong kiba hap ha ki jaka ïa kajia pud laiphew hynriew tylli ki la hap ha Meghalaya, katba tang ar tylli ki hap ha Assam namar ki paitbah nongshong shnong ki dei ki Nepali bad ki Boro.
