Nongstoiñ, Risaw 24: Halor ka jingud jingnam jong ki paidbah ka thaiñ Ri Muliang, ka KSU Ri Muliang Circle, ha ka jingïalam u samla Biangboy Sangriang President ryngkat u samla Dominic Kharmaw General Secretary, ha ka sngi palei ka la leit ban jurip kyndit ïa ka Nonglang PHC.
Ha ka jingleit jurip, la lap shibun ki jingduna ha katei ka Hospital ha Nonglang. Ki paidbah kiba leit shim dawai kim ju ïoh dawai bad ka daw ba kim ïoh dawai, ka dei namar ba khlem don u Pharmacist. Lada ki ïoh dawai ruh dei ba la shu ïa ai ki staff nurse.
Nalorkata dang don ruh sa kiwei kiwei ki jingduna ha katei ka PHC kum ki jingthiah jong ki nongpang, ha kaba la shu phah thiah ha ka store room. Ki dawai ruh katkum ka jingdonkam katei ka PHC kam shym ïoh satia. Man ka por lada donkam 4000 ka shait ïoh tang kumba 500 ne 1000 eh ki dawai.
Halor kane na ka liang ka seng ka la ïoh leit buh jingthoh sha ka DMHO bad dawa ba ka sokar ka dei ban pynbiang noh ïa baroh kitei ki jingdonkam jong katei ka PHC. Namar ka jingdon jong ka PHC kam don jingmut ei ei lada ym lah satia ban ai ka jingshakri kaba biang na ka bynta ki paidbah nongshong shnong.
