Bun satang ka jinglut ïa ka jingmih, shem jingeh ki nongrep ban shna karkhana pynmih sboh

Nongstoiñ, Naiwieng 12: Ka West Khasi Hills ka dei ka District kaba palat marshiteng na ki nongshong shnong ki dei kiba im ha ka rep ka riang. Hynrei kawei ka jingeh kaba ki paitbah ki ïakynduh ka dei namar ba katba nang mih ki sngi bad ki snem, ki nang tyllun sha khmat ka khyndew ka la nang man rim bad ka la nang tymmen bad haba ki rep ki riang ki la hap ban pyndonkam da ki dawai sboh ba bun jait.
Kumba long ha kine ki snem ki dawai sboh ba ki nongrep ki ju pyndonkam na ka por sha ka por ki dei u urea, DAP, potash, dohshyieng bad kiwei kiwei ki jait dawai sboh ba ki nongrep ki ïoh na ka tnad Agriculture lyngba ka Subsidy ba ka sorkar ka la mang na ka bynta jong ki.
Ka jingpyndon kam ïa kitei ki jait dawai sboh ym lah ban len ba na ka liang ka tnad ka koit ka khiah bad wat ka sorkar ruh, ka la ju pynsngewthuh sha ki paitbah ba ka jingpyndon kam dawai sboh ha kaba rep ba riang, khamtam ha ki jur ki jhep ka lah ban ktah ïa ka jingkoit jingkhiah jong ki briew.
Hynrei u Bah S.Marngar uwei na ki nongrep u la ong pat ba ki paid nongrep kim banse, namar lada kim pyndon dawai sboh ruh ki jingthung jingtep bad ka rep ka riang kam long shuh namar ka khyndew ka la man rim bad kam sei soh shuh.
U bh P.Thongni u la ong ruh ba ha kaba ïadei bad ka jingpyndonkam jong ki nongrep ïa ki dawai sboh, ym lah ban len ba ka dei tang namar ka jingbym lah bad ka jingbym don jong ki nongshong shnong kiba shemphang, kumno ban pynkhlaiñ ïa ka rep ka riang da kaba seng ïa ki karkhana pynmih sboh kiba la shna na ki phlang ki kynbat, ki sla dieng sla siej ryngkat bad ki kynja sboh eit masi, eit sñiang, ki phlang ïap, ki sla dieng kiba ba la ïap khlem da pyndonkam ïa ki kynja dawai kiba lah ban ktah ïa ka jingkoit jingkhiah jong ki briew.
U la ong ba haduh kine ki sngi ym lah ban len ba ki heh saipan napoh ka jylla bad na West Khasi Hills District, ki ïabeh ban seng ïa ki karkhana ki bym don don jingmyntoi ei ei ruh em na ka bynta ki nongrep. Hynrei ki karkhana kiba ki phaikhmat eh ki dei ki karkhana kiba ai jingmyntoi tang ïa ki bar jylla bad kiba pynjaboh artad ïa ka mariang.
Kum ka nuksa ha West Khasi Hills da ki spah tylli ki karkhana thang dewïong ki la don ha Shaklang, ka karkhana saiñ nar ha Riwang kaba la don la kham mynshuwa bad sa kawei ka la sdang ban pynïeng biang ha rud ka wah Rwiang hi. Haba phai sha kitei ki karkhana ka bai seng ban shna ïa ki ka lah ban lut da ki phew klur tyngka, hynrei tang namar ba lada ki trai jaka ki ai jingbit ki lah ban ïoh da ki phew lak tang ka bai jaka namar ki nongseng ki dei ki bar jylla kiba heh spah kim don pat ka jingsngew ïa kiwei pat.
U la ong ruh ba ha kaba ïadei bad ka jingsdang ban seng ïa ki karkhana pynmih ïa ka sboh kaba khlem khleh dawai laner ka (pure organic fertilizer) na ka bynta ki nongrep, la pyrshang ban wad jingtip na kylleng ba haduh katno ka jinglut lada don kiba sdang ban seng ïa kiba kum kitei ki karkhana bad la ïoh jingtip ba lada ki dei ki karkhana kiba heh ka jinglut ka lah ban long da ki klur tyngka.
Shuh shuh haba u pyrshang ban tih bniah shaphang ki karkhana kiba kham rit bad kiba kham duna ka jinglut ym shym pat la ïoh ïa ka jingtip kaba thikna. Haba kheiñ antad ïa ka jingdonkam sboh jong ki nongrep ha West Khasi Hills kaba kynthup naduh ki jaka rep jhur, rep soh, rep kba bad baroh ki jait mar rep ha ka shisnem ka jingpyndon kam sboh ka kot da ki phew hajar metric ton.
Haba phai pat sha ka jingïoh dawai sboh jong ki nongrep na ka tnad Agriculture pat uwei u nongrep u lah ban ïoh tang shiphew haduh khatsan kilo bad ki lah ba don lehse kumba katto katne ngut kiba lah ban ïoh sanphew haduh shispah kilo.
Lada leit thied na ïew pat shi byrni sanphew kilo u urea ka dor ka long shi hajar hyrñiewspah sanphew tyngka kamut ka dor shi kilo, ka dor ïew jong ka dawai sboh DAP pat ka la poi kumba shihajar hynñiewspah shi byrni sanphew kilo.
Watla katta ruh ki nongrep ki hap ban ïa ksaid tyngeh ban thied ïa kitei ki dawai sboh, namar ba lada kim pyndon kam ki jingthung jingtep bad ka rep ka riang kam myntoi satia.
Ka jingkylli mynta ka long hato ka sorkar ka kham sngew tynnad ba ai jingbit ïa ki karkhana pynjaboh mariang, kiba pynmih ruh ïa ka tdem kaba pynsniew ïa ka lyer kaba khuid, tang na ka bynta ka jingmyntoi jong ki katto katne ngut ki benami, ne ka kham ñiew kor ïa ki nongrep kiba dei ki kynrad jong ka jylla.