Bun palat kiba bam ar maloi ha Langpih Sector, lah ban jwat ka kam pynbeit pud ha ka wat ba-ar

Nongstoiñ, Nailar , 24: Katba nang mih ki sngi, ki jingshisha ki nang paw pyrthei ha kaba ïadei bad ka jingdon jong ki nongshong shnong ha ki jaka khappud bad ka Assam kiba bam ar maloi. Kumta kan shem jingeh haduh katta katta ban pynbeit ïa u pud u sam ha ka Langpih sector.
Ha ka jingbuddien bniah jong u nongthoh khubor la lap ba na man la kawei pa kawei ka shnong kiba don ha khappud, ki don ki nongshong shnong kiba na ki shnong Garo bad Khasi, kiba pynrung ïalade ha baroh ar tylli ki thup kyrteng nongthep vote (electoral roll) jong ka Meghalaya bad Assam. Kiba kham bun ki nongshong shnong ki ba leh ïa kata ki dei naduh ki shnong kiba don ha ka thaiñ Kamphaduli, Nawa-para, Dronpara, Bangjeng ter ter haduh Kyrshai.
Nalor kata ki don ruh ki nongshong shnong kiba dei ki Khasi, kum na Langpih, Mawlan, Ïew nongma, Mawdiang-snam, Umwali haduh Umbyrsit, kiba pynrung kyrteng ïalade ha ka Electoral roll jong ka sorkar Assam. Ka jingpynrung kyrteng jong ki ka long tang na ka bynta ban ïoh jingïarap kum ki skhim shna ïing shna sem bad kiwei kiwei.
Ki nongsynshar shnong, ki riew rangbah bad ki samla na kitei ki shnong ki la ong ba ki don haduh ar hajar tam ki nongshong shnong kiba don kyrteng thep vote ha Meghalaya bad Assam. Hynrei, kumba long mynta ym pat lah ban pynpaw ïa ki kyrteng jong kitei ki ar hajar ngut tam kiba don kyrteng thep vote ha baroh ar ki jylla, namar ki dang don shibun kiwei pat kiba ka jingbishar bniah ïa ki kyrteng, ki shnong ba ki shong bad ki polling station ba ki don kyrteng ka dang ïaid shait shait shait tad haduh ban da lap lut ïa baroh.
Ban lap ïa kitei ki ar maloi ka dei ka kam kaba eh haduh katta katta, kumta ka sorkar ba ka dei ban shimkhia halor katei ka kam, namar lada ka sorkar ka shu sngap mynthi bad kam leh ei ei ban lait na kiba bun ki jingeh, ki riew rangbah na khappud kim banse ban leit sha ki bor kiba kham halor bad wat shaduh ka Election Commission jong ka ri India ba kan kan leh ïa kaba donkam.
Ki nongsynshar shnong ki la pynpaw ba ki kyndon ba ka ECI ka la pynmih, ka ong uwei u briew kawei ka vote. Kumta ka long kaba beaiñ ba uwei pa uwei u briew u lah ban thep vote ar sien lai sien ne kat ba u sngew bit. Hynrei kata ruh ka shong ha ka ECI ba kan rai. Ka shong ha ka mon jong uwei pa uwei u ba pynrung kyrteng thep vote ïalade ha ki ar jylla ba kin rai shano kin leit sha Meghalaya ne sha Assam, ong ki riew rangbah na thaiñ Langpih.