Bun na ki skhim ba la ïoh work order naduh ka EC barim la shah pynsangeh ha kane ka EC mynta: Titos

Shillong, Nailar 19: Ki MDC ka Liang pyrshah ha ka sngi baar hapoh ka jingïalam jong u Bah TW Chyne u Nongïalam ka liang pyrshah ki la leit ban ïakynduh ïa u CEM ka KHADC u Bah Shemborlang Rynjah ka long ba hadien ba ki la ïohi ba mynta la ïaid ki bnai bad ki sngi bad la jan kut sa u snem kim ïohi ïa kano kano ka dak ka shin bad ki kam kiba ju pyntyllun na ka por sha ka por khamtam la ïohi ba ki sahkut bad dei na kane ka daw la leit ban pan jingshai halor kine ki kam.
Hadien ka jingïakynduh bad u CEM bad ban ïakren bad ki lad pathai khubor u la ong ba kaba nyngkong ka mat ka dei ban pynpaw ba ha ka EC kaba la dep ki constituency baroh ki la ïoh ïa ki skhim jong ka 15th Finance Commission jong ka 1st Installment kaba lehse ka dei kumba mar 30, 40 haduh 50 lak eiei bad la ai ïa ki work order ruh shwa ka elekshon MDC bad la pyntrei ïa ka pat hadien ka elekshon bad mynta naduh u bnai Lber ne Ïaïong ki la sdang ban pyntrei ïa ki kam hynrei la ïohi ba kynsan kynsan ka la don ka jingpynsangeh ban siew ïa ki bill kaba dei jong ki skhim barim bad ha ka order la ai daw ba la suspen noh ban siew ïa ki bill da kaba ong ba ka don ka jingeh ha ka technical.
“Dei na kane ka daw ngi la kynduh ïa u CEM bad na ka liang jong u, u la pynshai ba ka don ka jingeh ha ka technical bad ngi kyrmen ba ha kine ki sngi ban wan yn sa lah ban pyntreikam noh ïa kane ka online payment ïa baroh ki skhim jong ka 1st 15th finance Commission bad ngi kyrmen ba baroh ki kam ynsa lah ban pyntrei biang bad ngi kyrpad ïa ki nongpyntrei ba kin ïaishah namar na ka liang jong ngi, ngi la shimkhia khnang ba kan ym don ka jingshah pynthut,”ong u Bah Chyne haba kren sha ki lad pathai khubor.
U la ong ba kawei pat ka mat kadei halor ka jingslem palat ban siew ïa ki Bill, ha kaba kane ka bill kam dei tang ïa ka online payment hynrei ki bill ki bym ïadei ruh bad kane ka online payment kiba la lah slem kiba la don kumba 7, 8, bad haduh shisnem halor kane ruh ka la don ka jingud halor ka jingpynslem ban siew ïa ki bill kumta la kyntu ïa u CEM ban pynkloi ban siew noh ïa kine ki bill khnang ba kan ym long ka jingktah ïa ki kam namar 100% na ki skhim la pyntrei shwa bad sa ïoh ka pisa.
“Kawei pat ka dei ka 2nd installment kaba dei jong u snem 21-22 kiba dei na ka untied bad tied ha kaba ïa kine ngi la dep phah ïa ki proposal naduh ka samoi treikam jong ka EC barim bad ïa kine ki skhim pat yn pyntrei da kane ka term kaba mynta te hynrei kine ruh mynta ki sah ha ka umdum, namar ïa kine ki skhim ki JE ki la leit thew leit woh haduh ha spot bad kane kan ktah bha ïa ki MDC namar da la pynthikna hynrei lada ym ïoh ïa ka work order kan ktah shibun, hynrei u CEM halor kane ula ong bay m pat ïoh ka pisa na Delhi bad um shym lah ban ai ka jingkular halor kane bad ong ba kane ka shong ha ka jingïaid ka por bad ka jingpyntreikam ïa ka 1st installment,” bynrap u Bah Chyne.
Haba phai pat sha ka Urban Scheme naba ki don ki MDC ha Sor ki bym ïoh ïa ki skhim jong ka Urban Area bad halor kane ruh u CEM u la ïathuh ba ka la don ka jingïakynduh bad ka sorkar bad ong ban hap ïai buddien ïa kane ka kam bad kane ka long ka jingeh ïa ki MDC kiba don ha sor, ong u Bah Titos.
“Ngi la ïakren ruh bad ki katto katne ki skhim ba ki MDC baroh ki ju ïoh, kum ki skhim ha ka liang ka Sports, ka Arts and Culture bad ka Education kaba ngi ai ïa ki skul artylli ha ka shisnem ban siew tulop, bad ïa ka budget la dep pass naduh u bnai Jylliew hynrei halor kane ruh ngi khlem ïoh ki shithi kumta ngi leit kylli ïa u CEM u la ong ban buddien bad kumta ngi kyrmen ban ïoh pyntreikam ïa kane,” u la ïathuh.