Ka dei ha kane ka sien kaba mynta, ba u paidlang ka Garo hills, ula dei ban da hun hi jrut bad ka daw ka long, namar ba ha ka ïing dorbar jylla, kaba dei ka ïing thaw aiñ jong ka sorkar, ki la don lut da ki briew jongki, kum ki nongïalam, lada dei naduh u myntri rangbah, naduh u lamphang dorbar bad ïa u nongïalam liang pyrshah ruh kumjuh bad kane ka jingjia, kam ju kham jia satia ha ki khep kiba la dep bad dang ha ka dorbar kaba la dep, ngi dei ban kynmaw ba u Myntri Rangbah bad u Nongïalam liang pyrshah, u dei u Garo, hynrei u lamphang dorbar, u dei u khasi.
Shuh shuh, wat ha ka ïohkam ïohjam ruh, ki la dei ban da kdang hi pdik, ha kane ka kynti, namar ba naduh ba la pynkhih ïa ka bhah kam bhah jam, mynta ki la ïoh pura, ïa la ka jong ka bhah, ha ka kyrteng ka roster system bad ki jingkheiñ, kin sa paw shai ha ki sngi, ki ban sa wan, namar ba kiba ïoh kam sorkar, na katei ka jaitbynriew, ki don tang 33 percent antad haduh mynta, hynrei katei ka jingkheiñ, kan sa kylla, ynda haba ka tnat Statistic kan pyni ïa ka khanasamari thymmai.
Nangta sa ki jingtei nam kiba shyrkhei, ki la nang mih sha Garo hills, naduh ka Medical College, ka University, ka Stadium bad sa bun bah ki jingtrei kiba rad bah jong kane ka sorkar MDA, ba la khlieh da U Conrad Sangma lem bad arngut ki synran ba iajan eh jong u, U Bah Prestone Tynsong bad U Ma Sniawbhalang Dhar.
Mynta ka la mih sa ka jingïakren ïa ka nongbah tlang jong ka Garo hills bad katei ka jingïakren ruh kam donkam satia ban mih ha Ïing dorbar, lada kam dei ka buit ban kyntiew skong ïano re ïano, namar ba lada U Conrad Sangma, un jin da la leit rah ha ka kynhun myntri jong u, kumta kan jin da la long ka rai kaba pura, ha kaba yn nym don satia mano mano ban nud ban pyrshah, namar ba ka kynhun jong ka NPP, ka la khlaiñ bor bha bad kumta ïa katei ka rai, yn sa nang pynmih da ka bor jong U Lat bad sa shu rai pynskhem da ka ïing dorbar.
Don na ka liang jong ki MLA, kiba pyrshah ïa katei ka mat, ba la leit rah da U Mukul Sangma, hapoh ka ïing dorbar, hynrei katei ka jingkren pyrshah kam don jingmut eiei ruh em, namar ba kan bha, ba kan da wan beit da ka aiñ, ban ïa kaba shu leh sop sop, kumba ka jia ha kine ki sngi lane kaba mut, ba lada yn pynbna ïa ka Tura, kum ka nongbah tlang, kumta kan wan sa ka Secreteriat ha Tura, kan wan sa ka ïing dorbar thymmai ha Tura bad kumta kan kiew ka roi ka par bad ka ïoh ka kot jong u paidlang ha Garo hills, namar ba ki don ki nongïalam kiba peit jngai ïa ka jaitbynriew.
Lah ruh ban ong ba ha kine ki sngi la ïohi ba bun na ki MLA Khasi kim da nud than ban ang hapoh ïing dorbar Thaw Aiñ ka jylla naba ïa u la kam synshar ïa ka Sorkar la dei beit da ka seng NPP bad dei halor kane ba ki donkam ïa ka doh kyndang bad wat ki MLA Garo ruh ki ïatylli hapoh ka Ïingdorbar Thaw Aiñ hynrei la ïohi ba ki MLA Khasi bad Jaiñtia kim ïa tylli satia bad don ruh kiba kyrshan ïa ka Sorkar laitnoh ki MLA jong ka VPP.
