Bah Renikton Tongkhar, MLA jong ka Mawkyrwat, ula leit rah ïa ka mat kaba kongsan bha, halor ka jingïarap ïa ki briew, kiba la don ha tmier ka jingïap bad kiba shah sumar ha ki hospital ne ha ki ïing ki sem jong ki bad halor kane ka mat, U Bah Tongkhar, ula buh da ka kyntien Comfort Care, kaba donkam ïa ki hospital, ba kin buh ïa kiba kum kitei ki nongpang kiba la kutlad na ka jingsumar bad kiba dei sa tang ban ïap noh.
Ka jingkren jong utei u rangbah, ka don ïa ka bynta kaba kongsan, ban ïarap lem ïa u briew, uba la pisa la lynga mynsiem bad uba la pynkhreh ba un pynkut noh, ïa la ka jong ka jingim, hynrei ka don pat ka mat kaba ïasnoh bad kata ka long, la ki hospital, ki ju ïarap ne em ïa kum kine ki briew, kiba pang ba shitom jur, katba ki dang dei ka por jong ki, ba kin don ha ka jingshah sumar; namar ha kine ki sngi, ngi ïohi, ba ki hospital, kim don shuh ïa ka mynsiem ïa tip lem, ka jingpyrkhat briew, namarba kat ïa ino ino i jingdonkam iba rit duh, ki ïa peiñ bad ka pisa bad la ju lap bha, ba tang ïa kawei ka drip ruh ka hospital, kam ju ïarap satia ïa u nongpang bad ïa kawei ka test snam kaba rit ruh kam lah ban ïarap, hynrei ka don sa kawei ka rukom, kaba ki leh ha kine ki sngi bad kata ka long ba ki pan pisa lypa ha shwa ba kin leh ïa kano kano ka test ïa ki nongpang.
Kam dei tang kata, ka ju mih bha, sa kawei ka kyntien bad kata ka long, ba mar ïa ïap u nongpang, ki hospital, ki la beh thong ïa kiba ha ïing, ban pyni ïa ka jinglut jingsep bad ban dawa ba kin siew mardor, lada ki donkam ban sei ïa ka met ïap bad ki da kren shai ba lada ym lah ban siew mar mar, kumta kin leit thep ïa ki met ïap sha ki jaka buh met ïap bad kin nym pyllait hi ruh ïa kato ka met ban leit kit sha ïing.
Ha ki phew snem mynshwa, kane ka jinglalot kam ju kham jia ha ki hospital, khamtam ha ki hospital mishon, ha kaba la ailad ïa ki trai ïing ba kin rah ïa ka met ïap bad ynda haba la lait miet lait ïa, ki sa leit ïakren bad pynbeit ïa ka bailut baisep bad ka da don ruh ka jingmab, ïa ka jingkheiñ jingdiah, namar ba uto uba shah sumar, ula khlad noh.
Ha kine ki sngi, ka jingleit shah sumar pang, ka dei tang ïa kiba riewspah bad ka pisa, ka dei ban don lypa shi pla bad wat ban da don da ka ATM Card ruh kam ïahab satia, namar ba ka jingleit rung sha ki pharmacy, ka long kaba jan baroh arphew saw kynta (khamtam ïa kito ki nongpang kiba la kham jur) bad ka sorkar jylla, ka la dei ban pynïaid ryntih ïa kane ka kam, namar ba ka dei tang ka jingshah sumar ha ki hospital, ha kaba u nongpang, u hap ban siew lypa, ïa ka bai lut kaba dei ïa ki jingdonkam jong u bad kam ju don ka jait kam, kaba hap ban siew lypa shwa ban trei, lada ka dei ka tulop u myntri rangbahduh ruh, un hap ban shim ynda kut bnai bad wat ïa ka jingtrei kaba da ki spah klur, ki ju siew, ynda haba ka kam, ka la dep pura, katba tang ha hospital, ba tang ïa u thyrnia injek, hap ban da siew dor lypa, shwa ban pyndonkam.
Kane kam jia ruh tang ha ki hospital shimet ne jong kiba pynïaid bad Khmih da ki mission, hynrei kaba sngewsih palat ka long ba wat ha ki hospital sorkar la hap ban pyntreikam bad pyndonkam da ka card MHIS na ka bynta ban siew ïa ka bai thiah bad sumar nalor kata sa la dawai ruh hap thied nabar bad kane ka la buh jingeh bha khamtam eh ïa kiba dukan kiba kyrduh kiba duh ka jingkyrmen ban phai shano shano lada ki pang ki shitom.
Dangshen lah ban pynkymaw ba na ka liang ka seng FKJGP haba leit jurip ïa ka Civil hospital Shillong ka la lap bad pynpaw ïa ka jinglyngngoh ban lap bad ki nongpang ki hap thied dawai nabar.
Kumta lah ban ong ba kam myntoi satia ïa ka sorkar jylla ban kob ba ki lad jingsumar ha ka jylla ki la bun kiba biang haba wat tang ha Shillong ruh ka jingduna kaba dang bun bha.
