Shillong, Risaw, 24: Ka jingjot bad ka jingpei thliew ka surok ha ka shnong Mawlai kaba pynïasoh naduh Standbus ter ter shaduh ka shnong Kynton Massar, Mawkynroh-Umshing, Mawtawar shaduh Mawsiatkhnam ka la pynsuhsat bha ïa ki paidbah ha ka leit ka wan bad ha ka rah ka rong.
Ki ar tylli ki shnat treikam jong ka Khasi Students’ Union (KSU) ba kynthup ïa ka Mawlai Circle bad ka NEHU Unit ba la lamkhmat da u President jong ka KSU Mawlai Circle u samla Biangbor L. Paliar bad u President jong ka KSU NEHU Unit u samla Sandy Sohtun ha ka sngi Palei ki la aiti da ka jingthoh ha u MLA jong ka Mawlai Constituency u Bah Brightstarwell Marbaniang da kaba kyntu ban phah maramot noh ha ka surok PWD tang naduh jingkieng Mawlai Kynton Massar ter ter shaduh ka Gate 5 jong ka skulbah NEHU, Mawkynroh Umshing.
Kine ki nongïailam ka KSU ki la pynsngew ha u MLA ba ka jinglong jingman jong kane ka surok ka la jot rathai bad ka la buh jingma bad wanrah ka jingmynsaw ïa ki nongleit nongwan bad khamtam eh ïa ki samla pule bad ïa ki nongtrei jong skulbah NEHU.
Ki la pyntip ruh ba dang ha ki bnai ba ladep ki la don shibun ki jingjia bad ki jingujor halor ka jingïatyngkhuh kali bad ka jingshah tynrah kali jong ki nongleit nongwan ha shilynter jong ka sruok bad kaba la jia ruh wat ïa ki samla pule jong ka skulbah NEHU.
Na ka liang jong u MLA u la kular hakhmat ki dkhot jong ka seng ba un sa shimkhia ban phah maramot noh mardor ïa kane ka surok ha kine ki kyndiat sngi ki ban sa wan na ka bynta ka jingbit jingbiang jong ki samla pule bad ki paidbah kiba ju pyndonkam ban ïaid lyngba kane ka surok.
