Kane ka dei ka aïom Khrismas ne ka aïom lehkmen na ka bynta kiba bubn ki Khristan, kumba 740 snem shuwa ban kha ia u Syiem ki Syiem bad u Trai ki Trai U Jisu Khrist, U Prophet Isaïah u la ïathuhlypa kumne “Namar ha ngi la kha ïa u khun, la ai ïa u khun ha ngi; te ka jingsynshar kan long halor ka tyrpeng jong u: bad yn khot ïa ka kyrteng jong u, “U Baphylla, U Nongsylla,” “U Blei Bakhrawbor,” “U Kpa Bymjukut,” “U Syiem ka Jingsuk.”. Kumjuh ruh u Prophet Mika u la iathuplypa “Hynrei, ma pha,
ka Bethlehem Ephrathah,la pha long kaba rit
hapdeng ki hajar Judah,na pha keiñ un mih ha nga uwei u ban sa long u nongsynshar ha Israel; uba ka jingmih jong u ka long na mynhyndai, naduh bymjukut”. Kumjuh ruh kumjuh ruh ka Gospel u Mathaïos bad kiwei ki kitab ki ïathuh shaphang kumba la la kha ïa u Jisu (Isaïah 9:6/Mika 5:2).
Hooid kata ka tarik kam shym la don ha ka jingthoh hynrei ka dei ka jingjia kaba shisha kumba la paw ha kitei ki ïathuhlypa, hynrei ngi la sdang ban ïohsngew ha kine ki sngi ba la don wat ki riewngeit Khristan hi kiba sdang ban ong ba kim rakhe shuh ïa ka Khristmas namar ba ym shym la don ha ka jingthoh! Ha ka jingïakren paralok hapdeng jong kine ki riewngeit kiba la kham ngam jylliew ha ka jinglong mynsiem ki ong ba ka Khrismas na ka bynta jong ki hi ka long beit man la ka sngi ha ka jingim. Niuma kata kadei kaei kaba ki shemphang, hynrei ka pyrthei jong ki Khristan salonsar hi kumba ki ju rakhe ïa ka sngi kha jong ki khun ki kti, kiwei pat ki riewkhraw ne kiba ieit bathoiñ jong ki, katno tam lei ka long ka kabu ban rakhe ïa kata ka aïom jong ka jingwan longbriew jong u Blei sha kane ka pyrthei.
Ka long kaei kaei kaba maïan haduh katta katta ïa ka pyrthei hi ban ïai pynkynmaw ba haduh katno ngi ki briew ngi long kiba la rem bad kiba pop; hynrei katno kata ka jingkhraw jong ka jingieit eh ka jong U Blei, ba ha kane ka pyrthei kaba ngi im bun bah ki briew ki kwah ban long blei ïalade pynban u Blei u jied ban wan long briew sha kane ka sla pyrthei ban aiti ïala ka jong ka jingim na ka bynta ban siewspah ïa ngi na ka jingkhum mraw jong ka pop bad ka jingïap. Haduh katno u Blei u ieid ïa ngi ki briew, ngi lah ban pyrkhat na kata kaei kaba u la kloi ban wan sha kane ka pyrthei ban shah ibieñ bad khlem jingsalia ban shim ïa ka jaka jong ngi.
Ka jingwan jong u Trai Jisu sha kane ka sla pyrthei ka la pynkylla lut ïa kiei kiei baroh kawei kaba baroh ngim lah ban lait na u ka long ka khubor kaba khraw katta katta. Baroh ki jingkheiñ ki sdien ha u, ki snem baroh kila kylla lut tang sha u bad ha ki por ba mynshuwa ïa ki snem la ju kheiñ kat kum ka jingsynshar jong ki syiem. Hynrei haduh ba la wan ma u kum u Syiem jong ki Syiem baroh ka jingkhieñ bad ka jngñiew ki la hap lut ha ka kyrteng bad ka tyrpeng ka jong u bad khlem ma u ym lah shuh ban khieñ ïa ki snem ruh bad mynta ngi ïoh ïa ki snem Shuwa u Khrist bad hadien u Khrist ne kata ka Before Common Era/Before Christ (B.C) bad ka Anno Domini (AD) kaba mut ha ka ktien Latin ka snem jong u Trai jong nga. Kumta khlem U Jisu ym lah shuh ban kheiñ ïa ki snem ha kine ki sngi.
Ha ka jingtwad jingmut na uwei u riew rangbah uba dei u Khristan, kumno u sngew shaphang ba ki la don ki nongïalap bad nonghikai kiba la kren tohmet bha bad ñiew babieit bha ïa ki Khristan kiba rakhe ïa ka Khrismas namar ba ki ong ba kam shym la don ha kajingthoh. Une u riew rangbah u la ong ba kam pher kaei ki sngewthuh, hynrei na ka liang jong u te yn da u la poi sha bneng ruh u ong ba u kwah ban kyrpad ïa u Trai Jisu ban rakhe kyrpang kyrpang ïa ka Khrismas ban ïai pynkynmaw ïa kata ka jingieit bah ka jong U Blei kaba la long ka daw kaba la pynlah pat ïa ki nongpop ban ïohpat ïa ka hok ba kin ïoh ïa ka jingim ba bymjukut. KA KHRISMAS BARUK IAPHI BAROH KI NONGPULE BAIEIT.
