Nongpoh, Jylliew, 30: Kiba bun ki paidbah ka jylla lane kiwei kiwei ki nongïalam ha ka jylla khamtam ki nongïalam ha ka kam sain hima sima ki lah ban don kata ka jingklumar jingmut, kaba dei hadien ba u National Vice President ka BJP, u Chuba Ao u la leit ban kyrduh kyrpang ïa u Dr. D.D Lapang ha ka ïingsah jong u ha Shillong.
Kum ban pynkyn-maw, u National Vice president ka BJP, u Chuba Ao ha ka 29 tarik u Jylliew 2023 la leit ban ïa kynduh kyrpang ïa u Dr. D.D Lapang, myntri barim ka jylla ha ka ïingsah jongu ha Shillong bad kumba la paw pyrthei ba kane ka jingleit jong u ka long ban leit aiti ïa kawei ka kot kaba la thoh shaphang ka jingïaid lynti ba 9 snem ha ka jingïalam u Narendra Modi ïa ka sorkar BJP ba ki kam ba radbah ba al leh da ka sorkar BJP ban wan rah ka jingkylla ha ka ri India.
Halor kane ka jingleit kynduh kyrpang une u heh nongïalam ka BJP kañ la wan rah ïa kata ka jingkularmar jingmut ïa kiba bun ki paidbah bad wat ki nongïalam, hynrei kumba la pynpaw da utei u nongïalam ka BJP bad wat u Dr. D.D Lapang la ong ba kam shym la don ei ei sha lyndet ha kaba u la wan tang ban aiti ïa katei ka Kot kaba la thoh shaphang ki kam ba ka sorkar BJP ka la leh ban wan rah jingkylla ha ka ri India tang hapoh ka 9 snem ba la ïalam da u Narendra Modi kum u Myntri rangbah duh ka ri India.
Haba wad jingtip na u National Vice President ka BJP halor kane ka jingthmu ba u leit ban ïa kynduh kyrpang ïa u Dr. D. D Lapang, u Chuba Ao, u la pynshai ba kam shym la don kano kano kaba sha lyndet ban leit kynduh ïa u Dr. D.D Lapang, hynrei kane ka jingleit kynduh ka long tang ban aiti ïa katei ka kot sha u Dr. D.D Lapang ba ka party BJP ka burom ïa u kum uta u Myntri Rangbah barim ka jylla Meghalaya bad halor ki shibun ki kam kiba u la synñiang na ka bynta ka roi ka par hapoh ka jylla Meghalaya.
U la pynshai ruh ba kam don hi ruh kano kano kaba ka party BJP ka thmu ban khroh ban wan sha ka BJP party kum uta u nongïalam ba la paw ha ka jylla Meghalaya bad ha ka ri India hi baroh kawei, hynrei kane ka jingleit kynduh ka long tang ka jingburom ïa une u nongïalam uba la leh shibun ki kam kiba bha na ka bynta ban kyntiew ïa ka jylla Meghalaya.
U Dr. D.D Lapang ruh kum u myntri rangbah ka jylla, u la pynshai ba kum u myntri barim ka jylla ym shym la poi pyrkhat ba u heh nongïalam ka BJP un wan ban kynduh ïa u bad ruh ban aiti ïa katei ka kot kaba la thoh shaphang ka jingïaid lynti ba 9 snem ka BJP bad ki kam kiba ka la leh ha ka jingïalam u Myntri Rangbah ka ri, u Narendra Modi.
Kum u nongïalam u pdiang sngewbha ïa kino kino kiba wan kynduh ïa u bad ruh u pynpaw ruh ka jingsngewkmen ba ka party BJP hapoh ka ri India ka kynmaw kyrpang ïa u kum uta u nongïalam na ka jylal Meghalaya bad haba ïa kren pat halor ki kam sain pyrthei kam shym don kano kano sha lyndet kaba ki wan ban khroh ïa u ban pynïasoh sha ka party BJP ne ba ma u ruh u don kata ka jingthmu ban leit sha ka BJP bad kane ka jingïakynduh ka dei hi tang ka jingburom ka BJP ïa u kum u nongïalam ka jylla kaba ki kynmaw ban wan aiti ïa katie ka kot kaba la thoh shaphang ka jingïaid lynti ba 9 snem ka sorkar BJP bad ki kam kiba ka la leh ha ka jingïalam u Narendra Modi, pynshai u Dr. D.D Lapang.
