Jowai, Risaw, 27: Mynta ka sngi U Blei da ki phew phew ngut ki nongwan jingïadeng kila ïoh ka jingduwai jingpynkhiah lyngba ki shakri U Blei haka Jingïaseng Ïalap (Festival of Peace) bala pynlong da ka Balang Presbyterian, Jowai ha madan Jrisaleiñ, Jowai.
Ïa kane ka Jingïaseng Ïalap kaba ar sngi la pynlong da ka Balang Presbyterian Jowai ha ryngkat ka jingïatrei lang bad ka Billy Graham Evangelistic Association, kaba la sdang naduh ma miet jong ka 26 tarik bad pynkut mynta ka sngi U Blei, ha ka jingïaseng por 10 baje mynstep bad ha ka por 2 baje nohphai sngi mynta ka sngi ïa ka khubor na ka ktein jong U Blei la sam da u Rev. Dr. R. R. Conville, uba la pynsngew ïa ki paid riewngeit shaphang u Jisu Khrist uba la shah halor ka diengphna na ka bynta ki pop jong ngi.
U Pastor Conville ula ong ba dei lyngba ka diengphna u Jisu Khrist ki riewngeit ki lah ban wan phai biang sha U Blei ban ïoh ka jingpynim bad ka jingkyrmen ban lait na jingteh mraw ka pop.
U la pynkynmaw ïa ki lai tylli ki bynta bad ki jingjia ha ka jingim jong ki riewngeit kata kaba nyngkong ka Jingkylla bamut, ba ar ka Jingngeit ha u trai bad kaba lai ka jingleh ha kaba paw.
Khatduh u Pastor u khot ïa baroh ki paid riewngeit da kaba ong “Ka shong ha phi ban jied, ïa u Jisu ne ïa ka pyrthei?
Ïa kane ka jingïaseng la pynkut ha ka por 7 baje janmiet bad ïa ka khubor na ka ktien U Blei la sam da u Rev. L. Nongrud, la pynrhem mynsiem shuh shuh ïa kane ka Jingïaseng da ki jingrwai na ki samla ka Balang bad kumjuh na u nongrwai ñiam ba paw ka ri u Vijay Benedict.
