Bun kiba duh jingmyntoi na ki skhim sorkar bym treh pynrung ha ka e-Shram : AJMW&LU
Jowai, Nailar 01: Ka All Jaiñtia Muster Roll Worker & Labour Union (AJMW&LU) ha ryngkat ka jingïatreilang bad ka All Jaiñtia Midday Meal Worker Union ha kane ka 30/07/2022 kila pynlong ïa ka jingïalang ha ïingskul Ladthalaboh, Jowai na ka bynta ban pynsngewthuh paidbah halor ki skhim sorkar bapher bapher kiba lah ban ïoh lyngba ki tnad treikam jong ka sorkar.
La ïathuh da ka ka AJMW&LU kumba long mynta “bun kiba duh jingmyntoi na ki skhim sorkar bym treh pynrung kyrteng hapoh ka e-Shram” bad ka seng kala buh ka jingkyntu ïa baroh ki nongbylla sngi ba kin shim ïa kane ka kabu kaba ai da ka sorkar khnang ba kan long kum ka lad jingkyrshan ha ka jingim.
Ki nongpynïaid jong ka seng kila pynpaw ba ka matpdeng jong kane ka prokram ka long “Lehbha katni, u Kune i, Ya Ka Mynstep: Ioh ka Mynrried u Chngain, Patein u Kyllep u Sdep“. Ha kane ka jingïalang la ïoh ïa ka jingkren na u ma Kitboklang Shadap, Vice- President AJMW&LU-CEC, u Dapherborn N. Suchiang, General Secretary, AJMW&LU-CEC, u Khroo Lamsalanki Pariat, Adviser AJMW&LU & AJMDMWU bad ka Mary Shangpung, Treasurer Thadlaskein C&RD Block.
Ha katei ka sngi la wan ban ïadonlang ruh da ka kong Bethcy Merry Toi kaba dei ka Labour Inspector West Jaiñtia Hills. Ka kong Toi kala ai jingbatai halor ka Eshram bad kiwei de ki lad jingïarap kiba ka sorkar India kala mang kyrpang na ka bynta ki nongtrei bylla sngi.
La ïoh ruh ka jingkren na u ma Biangpor Shylla uba la ai jinghikai halor ka jingtreikam bad ka jingmyntoi ba lah ban ïoh lyngba ki CSC.
U ma Khroo Lamsalanki Pariat haba ai jingkren ula kren bynñiaw halor ka jingbym shimkhia jong ki longkpa bad ki samla ba trei Mistari ban pynrung kyrteng ïalade hapoh ka Eshram. Ka jingbym pynrung kyrteng ïalade ka wan rah ka jingduhnong kaba khraw ïa ki nongtrei bylla ne ki nongtrei Mistari, kumta u kyntu kynpham ï baroh ba kin sngewbha ban shim ia kane ka lad ka kabu katba dang shah ka por, khnang ba kin ym babe hadien.
Shwa ban pynkut ïa ka jingïalang la don ka jingpule Soskular da baroh kiba poi sha ka jingialang hapoh ka jinglamkhmat jong ka kong Banaras Dhar, General Secretary, AJMW&LU, Khliehriat Block.