Nongstoiñ, Nailar, 20: Ha ka jingïaid jurip jong u nongthoh khubor ban tih bniah ïa ki jingeh jong ki paid nongrep bad ki nongkyndong, la shem ïa ki daw bah jong ka jingtroiñ ha ka kamai ka kajih kiba pyndiaw mynsiem shibun eh. Ki skhim ba bun jait ba la mang na ka bynta ki nongkyndong ki ïakynduh ïa ki mawsiang bah kiba khang lynti.
Kawei na kine ki skhim ka dei kata ka skhim kaba ïarap ïa ki seng ïarap dalade ïalade ba tip kum ki Self Help Group. Haba la tih bniah ïa ka daw jong ka jingbym seisoh lane ka jingduh noh shiteng por jong kiba bun bah ki SHG, la shem ba bun palat ki jnit ki jnat kiba hap ban pyndep ryngkat ka jingshimpor ba slem ban ai jingïarap ïa kine ki kynhun. Kane ka dei kawei na ki daw bah kaba pynlong ïa kito kiba la seng ïa ki SHG ban kem tlot bad jlep noh artad na kaba ïaid shaphrang ha ki jingthmu jong ki.
Ïa kine ki SHG, katkum ka plan jong ka sorkar kmie, dei ban register ïa ki ha ki Block ba ki don hadien ba la ithuh ïa ki. Kiwei pat ki kynhun kum ki nongai jinghikai (Consultancy) bad ki nongbei pisa lane ki Bank, kin ïatrei ryngkat ryngkat ban pyntyllun ki shalyntem jong ka jingroi.
Hynrei naduh ba la pyntreikam ïa kine ki skhim, la shem ba kam don jingïa sngewthuh jingmut lane ka jingïatreilang jong kine ki kynhun bapher bapher ka suki shaba palat. Kumta bun na kine ki SHG kim lah ban ïaid shakhmat bad ki kut noh tang shiteng por.
Kine ki SHG ki lah ban dei ki kynhun kiba shim ïa kita ki kam bapher bapher na ka bynta ba kin im jakpoh. Shisien ba kita ki jingthmu jong ki kim long kam, ki hap ban ïatrud ïa ka dieng ka maw tang ban im. Don napdeng ki dkhot jong kine ki SHG kiba hap ban phai sha ka thang rnga kum kawei na ki lad ban im jakpoh.
Wat lada yn pynsngewthuh ïa ki ba ka jingthang rnga ym dei tang ba ka pynlyngkhuid ïa ki lum ki wah, hynrei ka wanrah ruh ïa kiba bun ki jingeh bad ki jingkylla ha ka mariang. Pynban namar ba ym don da kawei pat ka lad ban im jakpoh kumno keiñ yn pynsangeh ïa ki. Ki bor ba dei khmih ki don ban ong aiu halor kane. Kaei keiñ ka lad ka ban plie na ka bynta kine ki briew haba ki kren shai kdar ba ki la poi ha ka kut lad.
Ki don pat ki kynhun treikam kiba shim ïa ki jait kam bapher bapher kum ka ri jingri, ka thaiñ ka wet, kam rep soh rep syntiew bad thung ïa ki kynbat dawai, ki hap ha kajuh ka apot. Ha ka por ba ki briew sorkar ki leit ai ïa ki jingbatai ha ki kumno ban ieng ha la ki jong ki kjat, shisien sngap sngew kumba ki lum Khasi jong ngi kin sa kylla kum ka ri Kanan. Hynrei ynda la ïakynduh bad ki tnad sorkar bapher bapher wat ka dud ruh ka kylla kthang. Balei ba hap ong kumta, ka daw ka long ki bun palat kita ki jnit ki jnat (Formalities) kiba hap ban pyndep.
Lada u nongkyndong ba duk un hap ban pynlut bai kali da ki bun phew sien ban mareh sha ki ophis sorkar bapher bapher, katno ka ktah ïa ka jingïoh jingkot jong ki. Ym tang katta ïa kheiñ sa ïa ka lut sngi lut ïa bad ka thait ka jrem khamtam eh lada thait ka bor pyrkhat, kumno u briew un long ï. Kumta ka dei hok ba kine ki SHG kin shu jah rngai tang shiteng por.
Lada phai pat sha kita ki jingpynshlur ban ieng ha la ki kjat da kaba shim ram na ki bank, ka long pynban tang ka jingphohsniew ramïa jong no re. Namar katkum ka rukom ai ram jong ki bank dei ban da pyndep ïa kiba bun bah ki jnit ki jnat kiba ha u nongkyndong u ba biej, u king baiong bad um pei phang hi ruh.
Katkum ka rukom u nongshim ram u dei ban don ïa kata ka jingbuh jingïada (security). Nangta shuh shuh don pat ki jait ram kiba u nongshim u dei ban noh synniang (personal contribution) na ka pla jong u kaba lah ban poi wat sha ki phew hajar. Ka jingshisha hi ka long lada uno uno u briew u lah ban sei na pla la jong da ki phew hajar um donkam hi ruh ïa ka ram.
Kine kiei kiei baroh ki paw shai kdar ba ka rukom shna ïa ki plan kam bïang ei ei ruh em. Lah ban ong ruh ba ki plan kumba ki long mynta ki shu pynitynnad tang ha ki jingthoh (File decoration). Hynrei lada pyrshang pyntreikam ha ki nongkyndong ka kylla nod.
Kumta, lyngba ka jingïakynduh bad ki paidbah ha ki nongkyndong la sngewthuh shai kdar ba ka sorkar ka dei ban kyndit thiah noh. Khamtam ka tnad planning jong ka sorkar ka dei ban phah jurip mar mar sha ki nongkyndong, khnang ban tip thikna ïa ki jingeh baroh, lym kumta ka long lehnohei ban shu ïa kren stad tang na sor khlem da leit khmih ïa ka jinglong jingman ha ki nongkyndong.
Ha ka Ri India baroh kawei, 80 na ka 100 jong ki nongshong shnong ki dei ki nongkyndong. Te lada ym shimkhia na ka bynta ki 80 kam don jingmut ei ei ruh em ban pynriewspah tang ïa ki 20.
