Bun ki shnong ba ïoh ïa ka skhim JJM ki poi tang ki pipe khlem ka um, pynlait noh ïa ka bai tiar ka skhim bylla 100 sngi

Nongpoh, K’Lyngkot 12: Ki Rangbah Shnong hapoh ka kynhun ka Synjuk ki Rangbah Shnong Ri-Bhoi District mynta ka sngi kila leit ban ïakynduh ïa u Abhilash Baranwal Deputy Commissioner ka Ri-Bhoi District ban ujor halor ka jingkyrduh um ki shnong watla bun ki shnong kila ioh ïaka skhim JJM bad ki pipe um kila poi haduh thliew iing hynrei khlem ka um kaba buh jingeh ïa bun ki paidbah nongshong shnong bad kumjuh ruh ban kyrpad sha ka sorkar ba ka dei ban pynlait noh mardor ïaka bai tiar jong ka skhim MNREGA kaba ri hadien ka sorkar pdeng hapoh ka jingïalam ka BJP kala pynkylla kyrteng ïa katei ka skhim sha ka VB-G RAM G Act 2025.
Haba kren sha ki lad pathai khubor naka liang u Bah PB Sylliang General Secretary ka kynhun u la ong ba kum ki Rangbah Shnong u la ong ba hadien bun ka jingujor naki paidbah nongshong shnong halor ka jingkyrduh um ki shnong watla ki shnong kila ioh pdiang ïaka skhim JJM kala pynlong ïaki Rangbah Shnong ban shimkhia ïa kane ka mat ban ïakren bad u DC ha kaba u la kular ban pynlong ka jingleit jurip sha kitei ki shnong kiba mad kum katei ka jingeh.
Ha kaba ïadei bad ka jingsah teng jong ka bai tiar ka skhim bylla 100 sngi naka liang ka kynhun ki Rangbah Shnong kila kyrpad sha u DC ban pynlait noh ïaka pisa bai tiar jong katei ka skhim kumba ka sorkar BJP mynta kala pynkylla kyrteng noh ïa katei ka skhim kaba ym lah ban tip kumno katei ka skhim ka long, hynrei bun naki shnong kila shim ram ïaki tiar ki tar ban pyntrei ïaki kam pynroi haki shnong ki thaw lyngba katei ka skhim bad lada ka sorkar kan dang pynslem kan long ka jingeh kaba khraw ïaki nongïalam shnong bad halor katei ka mat naka liang u DC ka Ri-Bhoi u la kular ban shimkhia bad ban ïaleh katba lah ban pynlait ïaka pisa shuwa ka Financial Year.
Shuh shuh naka liang ka Synjuk kala ioh ruh ban pynsngew sha u DC ha kaba ïadei bad ka jingpynslem ban tei ïaki 7 tylli ki Foot Overbridge ha Ri-bhoi District ba haduh mynta ym pat I dak eiei watla naka liang ka NHAI bad ki bor district kila dep ban jurip bunsien hynrei haduh mynta katei ka kam ka dang sahteng ha kaba naka liang u DC u la ong ba katei ka kam ruh yn sa sdang noh shen ha kine ki khyndiat sngi ban wan.
Bad lyngba kane ka jingïakynduh naka liang ka Synjuk kala pynpaw ka jingsngewkmen hadien bala ioh ban kren shibun ki kam bad u DC bad khmih lynti ruh ba kane ka jingïakynduh ba nyngkong jong u snem thymmai ba dei u snem 2026 ba kitei ki kam kin urlong bad seisoh naka bynta ka jingmyntoi jong ki paidbah.