Bun ki ong ba ka jingshna ïa ki ïing skul kiba paka kim ai vote, hynrei ngam pynsngap

Shillong, Nohprah 15 : Ka shimpor haduh 66 snem ïa ka skul Government LP ha Nongumlong kaba la ai ka jingshakri naduh ki snem 1956, ba kan ïoh ïa ka ïingskul kaba skhem bad kaba kham heh ïa kaba la tei ha ka jinglut kaba kot sha ka 37lak tyngka.
“Ki ong kane ka skul ka la sdang naduh u snem 1956, katba ïanga dang kha ha u snem 1975 kaba mut kane ka skul ka la tam bun bha ïa nga. Hynrei balei pat naduh utei u snem ka neh sah kumjuh,” ong u Myntri ka tnad C&RD ba dei ruh u MLA ka thaiñ hadien ba la dep ban plie ïa katei ka ïing skul kaba ar mala.
Nalorkata, u ong ruh ba naduh mar ïa jop ha u 2018 kumba u kular mardor u la lum jingtip ïa ka jingdon ki skul kiba la jot shaba palat. U la ïathuh ruh ba bun na kitei ki skul jong ka sorkar kidei kiba la pei ka tnum, pra ka kynroh bad don ruh kiba la jot rathai baroh.
“Bun kiba ong ïanga ba ka jingtei ïa ki ïing skul ba bha kan ym ai vote satia, hynrei nga pat ngam patiaw ïa kita baroh namar nga pyrkhat na ka bynta ka lawei jong ki khun ki kti jong phi. Ki bahaïing ha sem ki don la ka bynta, ki balang ruh ki don la la bynta, kumta nga ruh nga don la ka jong ka bynta na ka bynta ban kyntiew ïa ka pule puthi ha ka thaiñ,” u la ong.
Shuh shuh u la ong, “Kumta ha ka kylla kaba nyngkong, nga la ïoh ban mang haduh 3.83 klur tyngka ban shna ïa ki ïing skul kiba thymmai kum kine ha kylleng ka Mylliem constituency.”
Da kaba pynpaw ïa ka jingkmen ba ïa katei ka ïing skul la lah ban pyndep tang ha ki 8 bnai, u MLA u la ong ruh ba naduh ba u jop bad naduh ba kyntiew kyrdan na ka UP sha ka Secondary u ju ïarap kumba 3lak tyngka kawei kawei ka skul ban ïarap siew tulop ïa ki nonghikai. U la ai ruh ka jingïaroh ïa kito ki nonghikai kiba len ladade da kaba wan hikai ei ha ka por ba dang kyntiew kyrdan na ka Lower Primary shaneng.
Ha kane ka sngi la ïoh ruh ka jingkren na i Dr. Bahun L Tron, Associate Professor jong ka College of Teacher Education (PGT),ba ju wan hikai ei ha katei ka skul mynshwa, ka jingkren na i Kong M L Tron Headmistress bad nalor kiwei kiwei.
Na ka liang u MLA u la aiti ruh ïa ki kor computer na ka bynta ka jingdonkam jong katei ka skul.
Shwa kane, u Bah Hamlet u la ïathuh ba mynta u la pynkhreh ruh ban pynbiang ïa ka report card thik kumba leh ki nonghikai. Tangba u ong pat ba ka report card ba u pynbiang kadei ban kdew lut kiei ki kam ba u trei la ka long haba iadei bad ki lynti syngkien, ka umbam umdih, ka koit ka khiah, ka pule puthi bad ruh ki lad jingkyrshan na ka bynta ki samla jong ka constituency.