Bun ki nongrim ban shakri, thep kyrteng u kyrtong ka KHNAM ban ïakhun MDC election na Mawhati
Nongpoh, Rymphang 01: Katba ka election MDC ka la dang jan sa tang da ki sngi ba ki paidbah kin jied ïa ki nongmihkhmat sha ka ïing DorbaR thaw aiñ ka Khasi Hills Autonomous District Council (KHADC), ka Khun Hynñiewtrep National Awakening Movement (KHNAM) ha kane ka kynti ka la pynmih ïa uwei na u kyrtong ban ïa khun na Mawhati Constituency, kaba dei kawei na ka Constituency kaba don ha Ri Bhoi District.
Une u kyrtong ka KHNAM u dei u Bah Aiban Nongsiej bad mynta ka sngi u la pyndep ban thep kyrteng hakhmat ka Returning Officer ka Kong B.L Pakyntein, na ka bynta ba un long kum u kyrtong ba pura ban ïa khun ha kane ka election MDC na Mawhati Constituency.
Haba leit ban thep kyrteng mynta ka sngi ha ka ophis u Deputy Commissioner ka Ri Bhoi, ïa u Bah Aiban Nongsiej, la synrang lang ruh da ka jingdon lang u Bah Thomas Passah, uba dei u President ba rangbah ka KHNAM bad ryngkat ka jingsynran ki nongkyrshan jong u.
Haba kren ha kane ka sngi, u Bah Aiban Nongsiej, u la ong ka daw kaba la pynlong ïa u ban phai sha ka kam sain hima sima bad ruh ban ïa khun ïa kane ka election MDC na Mawhati, ka dei ka jingangnud jong u ban shakri ïa ki paidbah, ha kaba baroh shi katta kum u riew shimet u la ai ka jingshakri kiba bun na ka bynta ki paidbah ka thaiñ Mawhati.
U la ong ruh kum u samla, ha ka jingshisha um don kata ka jingthmu ban ïa khun election bad dei ka jingangnud ban dang shakri ïa ki paidbah, ba u la shim ïa kane ka sienjam ban ïakhun ïa kane ka election MDC halor kiba bun ki nongrim kiba u kwah bad angnud ban shakri kyrpang ïa ki paidbah.
Shuh shuh, nalor shibun ki kam kiba u angnud ban shakri na ka bynta ka bha ka mait bad ka roi ka par jong ki paidbah, u Bah Aiban Nongsiej, u la pynpaw ba ka thong kaba hakhmat eh kaba u kwah ban ïa khun MDC election ka long ban ioh lad ban rung ha KHADC na ka bynta ban shna ïa ki aiñ kiba khlaiñ ban ïada kyrpang ïa la ka jaid bynriew bad dei tang lada don kita ki aiñ kiba khlaiñ kiba ngi lah ban pynneh ïa ki riti ki dustur bad ïa ka jinglong kyrpang jong ka jaid bynriew jongi, u la bynrap.