Shillong, Naiwieng, 12: Ka Working President jong ka seng Congress, ka Deborah Marak, ka la pynbna ha ka sngi Balang, ba ka party ka dang pynkhreh ban pdiang biang ïa ki dkhot bad ki nongïalam ba la ryngkoh dieng kper da kaba pynpaw ba katto katne ngut ki nongïalam na ka Trinamool Congress (TMC), ki la thmu ban wan phai biang sha ka seng Congress.
“Ki don bun, ki ban sa wan pynïasoh iwei hadien iwei. Kumta, ngi dang pynkhreh. Ki don katto katne kiei kiei ha ka saiñpyrthei kiba ngi dei ban buhrieh. Ynda la dei ka por, ngin sa ïathuh ïa phi”, la ong ka Marak ha ki lad pathai khubor ha ka sngi Balang.
Haba kylli, hato ki MDC ka TMC kin pynïasoh neem sha ka Congress, ka la ong, “ki dang don ha lynti, shen kin sa poi.”
Haba kylli hato kin don neem ki ban mih noh na ka NPP, ka la jubab, “Ngim pat tip.”
U Secretary jong ka Meghalaya Pradesh Congress Committee (MPCC) u Bah Manuel Badwar u la kren shaphang ka jingpynkhreh jong ka party na ka bynta ka elekshon ka ban sa long ha Garo Hills Autonomous District Council (GHADC).
U la ong, “na ka jinglong jong ki paidbah ki kwah hi ban wan phai noh sha ngi, kaba mut ba ka Congress kan sa khie im biang. Watla ki briew ki kynthoh katno katno ruh, watla ki briew ki kren pyrshah ïa ka party katno katno ruh, ki paidbah ki pyni ïa ka mon ban wan ïasoh bad ka Congress.”
U Bah Badwar u la banjur ba ki dang bun kiba thrang ban wan rung, ka seng kan sa pyndonkam ïa ka jingstad. “Kam mut ba baroh kin ïasoh ne yn shah ban ïasoh. Ngi hap ban bishar, ka shong ha ki jait briew kiba kumno kiba wan pynïasoh ïoh lehse ki dei tang ki riewshim kabu lane ki dei kiba kwah shisha naduh mynsiem,” u la ong.
Da kaba kdew ïa ka jingpdiang dang shen ïa u Zenith Sangma, u la ong, “u Zenith Sangma u la rung da ka mon sngewbha jong u hi bad u dang don ka jingieid ïa ka party. Kum ïa kata ka jingpyrkhat ngi hap ban pdiang.”
Ka Deborah Marak ka la pynskhem ruh ba jingkhang ka plie na ka bynta kiba dang thymmai ruh. “Kino kino kiba kwah ban wan pynïasoh na kiwei kiwei ki party, ngim ju ong em ïa ngi, bad ki wan pynïasoh ruh khlem da shah teh kyndon. Ki kwah ban pynkhlaiñ ïa ka party Congress ha Rilum Garo sa shisien bad da kata ka jingthmu ki wan ban pynïasoh bad ngi.”
Haba kylli, shaphang u Myntri Rangbah barim u Mukul Sangma, ka Marak ka la kyntait ban kren eiei.
