Bun ki nong Manipur ba sah ha Shillong ki la leit phai, sa tang 77 ngut kiba dang sah: DC EKH

Shillong, Naitung 11 : Na ki 365 ngut ki nong Manipur kiba wan phet rieh sha Meghalaya khamtam sha Shillong na ka daw ka jingkynad ha katei ka jylla kaba sdang ha u Jymmang, bun na ki, ki la leit phai noh, ong ka Deputy Commissioner ka East Khasi Hills Kong RM Kurbah.
Katkum ka jingïathuh jong ka ha ki lad pathai khubor ha kane ka sngi Ba-Ar, ka DC ka la pyntip ba katkum ki jingkhein ba ki ïoh lum kiba sah mynta ki long satang 77 ngut katba kiwei pat ki la leit phai noh bad don ruh kiba leit sha kiwei ki jylla jong ka Ri.
“Don na kitei (ki nong Manipur) kiba wan sah shipor hangne ki la leit sha Aizawl bad don pat kiba leit sha Delhi lane sha Bangalore bad katto katne pat ki la leit phai sha Manipur,” ka la ong. Katkum ka jingïathuh jong ki, kiba bun na kitei kiba wan phet rieh sha kane ka jylla ha ka por ba don ka jingkynad ki ïoh jaka sah ha ki jaka ba pynbiang da ka Evangelical Baptist Convention Church bad ruh ka Chin Baptist Association.
Haba bynrap lang, u Additional District Magistrate, Bah Ronnie Wahlang u la ïathuh ba ha ka jingkynduh bad ki ryngkat ka jingdonlang ki bor pulit bad bor shnong ki la ïoh ban pynbeit na ka bynta ba kin lah ban leit phai da kaba suk ba sain sha ki jaka ba ki kwah ban leit.
“Kumba ka long mynta hi, ngi don sa tang 77 ngut ki briew kiba dang sah ha Shillong bad bun na ki, ki sah bad ki bahaiing ha sem, ne bad ki paralok bad ruh don na ki kiba la ïoh jaka sah ha ki hostel namar ki dei ki samla pule kiba kwah ban bteng ïa ka jingpule jong ki hangne,” u la ong.
Shuh shuh u la ïathuh ruh ba na ka liang u DySP u la leit hi dalade hynne ka sngi ban kynduh ïa ki bor pynïaid jong ka CDA bad CBCC ban pyntikna la ki dang don neem ki briew kiba dang sah hakitei ki jaka sah shipor ba ki buh.
“Hynrei ka kaiphod kaba ngi ïoh na u DySP ka long ba ym don shuh. Kumta kane ka jingdon sa tang 77 ngut ka long katkum ka jingai jingkhein ba la ai da ma ki hi bad ki jingtip baroh shaphang kitei ki briew ki don lut bad ngi hangne naduh ki number phone bad ngi dang ïai bteng ban buddien ïa ki la ki don neem kino kino ki jingeh ba ki kynduh la ka long jaka sah, ban ïoh jaka pule, jaka sah ne kino kino ki jingeh ba kin pyntip khnang ban pyntikna ba kin ïoh ban im da kaba suk kaba saiñ.”
Haba bynrap lang, u Superintendent of Police ka East Khasi Hills, Bah Sylvester Nongtnger u la ong ba na ka liang ki pulit hapoh ka jingïalam jong u DGP dang shen ki la pynlong ka jingkynduh lang hapdeng ki Meitei bad ki Kuki bad kyntu ïa ki ba kin pynneh ïa ka shongsuk shongsain katba ki dang sah ha Shillong. U ong ruh ba ki pulit ki kular ruh ban ai ka jingïada ïa baroh arliang kynhun lada donkam.
Ki bor distrik ki la pynpaw ruh ka jingsngewnguh ïa ka Dorbar Shnong Lapalang kaba naduh ba sdang ba wan phetwir kitei ki nong Manipur ka la ai jingïarap da ki marbam sha kitei ki longiing.