Bun ki MLA ki ban liem lyndang ha u 2023, na ka NPP ruh bun ki ban phet, ong u Dr Mukul

Shillong, Jymmang 17 : U Nongïalam ka Liang Pyrshah u Dr Mukul Sangma mynta ka Sngi Ba-ar u la ong ba kin don bun ki MLA ki ban liem lyndang ha ka election MLA 2023 bad nalor kata ka NPP kam dei ban khmih lynti ba baroh ki MLA jongka kin neh beit namar kin don bun ki ban phet bad ïakhun na kiwei kiwei ki party ruh.
“ Wat khmih lynti ba baroh kito ki MLA kiba phi (NPP) khwai na kiwei ki party da ki buit poh jongphi kin long ki mar kordor jongphi hynrei kin long pynban ka jingkit bakhia jongphi ” ong u Dr Mukul haba ïakren bad ki nongthoh khubor da kaba ther tyngeh ruh ïa ki jingpyrshang jongka NPP ban khring ïa ki MLA ka AITC bad jong kiwei kiwei ki party da ka bor.
“ Ngan kren shai beit bad lehse bun ki ban ym sngewtynnad hi ruh namar nga nud ban ong ba kin don bun ki MLA ki ban shah pynliem ha ka election 2023. Na kata ka daw kin don ki Seng Saiñ Pyrthei kiba haba ki tip ba kita ki MLA jongki kin ym jop shuh kin hap ban pynïakhun da kiwei ban ïakhun ïa kiwei pat ki seng sain pyrthei ha u 2023” ong u Dr Mukul.
U la pynkynmaw da kaba ong “ Peit aiu ka jia ha ka election MLA 2018 na ki 5 tylli ki constituency na Ri Bhoi baroh la jop da kiba thymmai suda. Kumjuh ruh na West Khasi Hills baroh 3 seat ruh da kiba thymmai.Ka jia kumjuh ha North Garo Hills, East Garo Hills baroh 3 ngut ki MLA da kiba thymmai suda. Kumta kan jia ha u 2023 ha kiba bun ki District” ong biang u Dr Mukul.
Ha kaba ïadei bad ka jingkob jong u Myntri Rangbah u Conrad K Sangma ba kin don 7 ngut ki MLA ka AITC ki ban ïakhun na ka NPP, u Dr Mukul u la ong “ Wat lada u kob kumta ruh tangba kin don ruh bun ki MLA ka NPP ki ban ïakhun na kiwei ki party namar kata ka long ka jingshisha bad nga tip ruh ïa kiba kum kita ki MLA”.
U la ong kitei ki MLA ka NPP kin ïakhun na kiwei ki seng saiñ pyrthei ym dei na ka AITC namar ka party jong ngi kam dei kaba khring ne kwai jubor ïa ki MLA jong kiwei. U la ong “ Ka NPP ym dei ba ka shu khroh jubor tang ïa ki MLA jong ka AITC hynrei jong kiwei ki seng saiñ pyrthei ruh kiba ka ïasynrop lang ha kane ka sorkar MDA. Tangba kumba ka NPP ka leh kiwei ki seng saiñ pyrthei ruh ki leh kylla ïa ka bad kane kam long satia kaba i tynnad ban ïohi”.
Ka NPP ka la pyrshang kat lah kat ïai ban khroh ïa ki MLA ka AITC bad kane ka rukom leh kam long kaba itynnad ha ka saiñ pyrthei. Ki leh ïa kane ha ka jingkut lad namar kim don ki kyrtong kiba biang kiba lah ban jop biang, ong u Dr Mukul.
U la ther ba kine ki jingkob jong u Conrad K Sangma ki long kiba u shu thok shu jler bad ïalam bakla ïaki paidbah. U leh ïa kane da ka jingthmu ban ïalam bakla ïa ki paidbah hadien ba ula ïohi ba ki paidbah man la ka sngi da ki spah spah ngut ki pynïasoh sha ka AITC namar ki kwah ban ïohi ïa ka jingkylla ha u 2023. “U leh ïa kane hadien ba u ïohi kaei kaba la jia ha madan man la ka sngi tang ban ïoh ïalam bakla bad ban ong ïa ki paidbah balei ba phi kwah pynïasoh sha ka Trinamool Congress haba da ki MLA jongka ki dang khreh mih hynrei nga tip ba ki MLA ka AITC ki skhem ka nongrim. Nga kwah ban kren shai ba ka Trinamool Congress nalor ki MLA jongka ba mynta kan ailad ruh ïa ki samla ban ïadon bynta ha ka saiñ pyrthei. Ki paid nongshong shnong jongka jylla kin sa nang ïohi ïa ki jingïai kylla jongka saiñ pyrthei ha kane ka jylla ha ki khyndiat por ban sa wan” ong u Dr Mukul.