Bun ki MLA barim kin wan phai biang sha ka Congress shwa ka elekshon MDC, kob u President ka MPCC

Shillong, Nailur 20 : U President jong ka Meghalaya Pradesh Congress Committee, Bah Vincent H Pala ha ka sngi Thohdieng u la pyntip ba ki don bun bha ki MLA barim kynthup ïa kito kiba la bat ruh ïa ka shuki Myntri Sorkar kiba pynkhreh ban wan pynïasoh biang shen sha ka party ha kane ka jylla.
Ïa kane u Bah Vincent H Pala u la ïathuh haba kren bad ki lad pathai khubor hadien ka jingïalang bad ki nongïalam ka party na ki District bad kumjuh na ki Block Congress Committee kaba long ha Congress Bhavan. La ïathuh ruh ba ha katei ka jingïalang ki la don bun bha ki nongïalam kiba wan ban pynïasoh thymmai
Haba pynkynmaw ïa ki 12 ngut ki MLA kiba phet noh na ka Congress bad leit pynïasoh sha ka Trinamool Congress, utei u heh ka party u la ong, “Katno ngut pat na ki, kiba sah ha ka TMC bad rung pat sha ka UDP, NPP bad kiwei ki party.”
U la ong ruh ba ha shwa ba kin mih ka mih ka jingkynnoh beit pyrshah ïa u hynrei mynta ynda ki la mih na ka party kaba ki pynïasoh ïano pat kin kynnoh.
Ha kajuh ka por u la ong ba kiwei pat kiba mih hadien na ka Congress, ki lah ban ong biang ba dei na ka daw jong u Pala. Tangba u ong pat ba don napdeng jong ki kiba leit ban pynïasoh bun tylli ki party hadien ba la mih na ka Congress kumta ïano kin kynnoh.
“Nga tharai ba kam long kaba dei ïa ki. Tang kawei ka long ba ka Congress watla ka don ha ka Liang Pyrshah kan ym shakri ïa ka jingmyntoi shimet jong ki naba ngi don hangne ym ban shakri ïa ka jingmyntoi shimet jong ki hynrei ban trei na ka bynta ka jingmyntoi jong ki paidbah,” u la bynrap biang.
Shuh shuh u ong ruh baroh hi kin ïoh pdiang ïa ka jingtyrwa ne ki jingpynshoi ban ïoh ïa ki kam pynroi, ïoh kam ïoh surok. “Hynrei lada ngi duhnoh ïa ka nongrim ba ngi don, ka akor ka burom kamut ngi la duh lut ha ka saiñpyrthei bad kane ruh ka long kumjuh mynta. Mynta ki lah ban don bad ka TMC, lashai ki lah ban don bad ka UDP bad hadien kata bad ka BJP kumta kaei kaban don bad ki, thylli kin ym don ei ei ruh bad ki,” u la ong.
Ha kajuh ka por u Bah Vincent Pala u la pyntip ruh ba ka party kan pynlong ïa ka jingialang jong ka party ha ka 11-12 tarik Risaw ha South West Khasi hills ha kaba kin don katto katne ki nongïalam kiban wan pynïasoh biang sha ka party.
“Ïa mynta hi ka pat long satia ïanga ban ïathuh kiei kiban wan phai biang sha ka party namar kim pat mih na ki party ba ki don kumta ngin sa ïathuh ha phi ha ka por kaba biang hynrei nga ai jingkular ïa phi ba bun na ki kin wan biang. Ki nongtrei ka Congress, kiba la iehnoh ïa ngi, ki kloi ban wan phai biang bad wat hynnin ruh ngi la don ka jingïalang bad bun na ki, ki kloi ban wan biang. Nga tharai phin sa ïohi ba bun kin wan ïasoh bad ngi.”
Na ka liang jong u Joint Secretary jong ka AICC ba dei peit ïa ka Meghalaya u Matthew Anthony, u la pynpaw ïa ka jingshaniah ba ka Congress kan leh bha ha ka elekshon ban wan ha ki autonomous district council (ADC), kiba lah ban long ha u snem ban wan.