Shillong, Nailar 10: Satang katto katne bnai ban poi sha ka elekshon MLA 2023, kiba bun ki MDC ki la nang khreh lypa ban ïakhun bad mih madan ban kiew sha ka kyrdan MLA. Nalorkata kin don ruh kiba pynneh ia ka jingbam ar maloi kum ki MDC bad ki MLA ruh ha kajuh ka por.
Napdeng ki MDC jong ka Khasi Hills Autonomous District Council (KHADC) kiba la thikna ban ïakhun ïa ka elekshon MA ha une u snem ban wan ki long u Chief Executive Member (CEM) u Bah Titosstarwell Chyne u ban ïakhun na ka United Democratic Party ha Sohra Constituency. U Bah Titos u la jop teng kum u MLA ha ka snem 2013, hynrei ha u 2018 u la shah pynliem noh ha u Bah Gavin Mylliem jong ka Peoples Democratic Forum (PDF).
Nalor u Bah Titos kiwei pat ki MDC jong ka UDP ki ban ïakhun ïa kane ka elekshon ha u 2023 ki long u Bah Paul Lyngdoh u ban ïakhun na West Shillong pyrshah ïa u Bah Mohendro Rapsang. U Bah Rapsang u la pylliem ïa u Bah Paul ha u snem 2018 na ka Congress. Hynrei ha u 2023 ym tip un ïakhun na ka Party aïu. Ki dak ki shin ki paw ba u lah ban ïakhun na ka BJP. Uwei pat udei u Bah Mitchell Wankhar, MDC jong ka Laban Mawprem uba thmu ban ïakhun na Mylliem Constituency pyrshah ïa u Bah Hamletson Dohling, uba la jop na ka PDF bad mynta i mat u thmu ban ïakhun na ka NPP. U Bah Mitchel u la jop ïa ka elekshon MDC na ka NPP. U Bah Bindo M. Lanong, uba la shah thung kum u MDC, udei u nongïalam ba rangbah jong ka UDP bad u kwah ban ïakhun na Nongkrem pyrshah ïa u Bah Lambor Malngiang, MLA shimet. Hynrei kine mynta baroh arngut ki ïaknieh ticket na ka UDP.
Ki MDC ka NPP kiba thmu ban ïakhun ïa ka elekshon MLA ki long u Bah Teibor Pathaw, MDC jong ka Mawlai Constituency uban ïakhun pyrshah ïa u Bah Process T. Sawkmie. U Bah Pathaw u la shah pynliem ha u Bah Process ha ka snem 2018. Nangta ka Kong Grace Mary Kharpuri, ka ban ïakhun na Shella Constituency pyrshah ïa u Bah Balajied Synrem jong ka UDP. Ka Kong Grace ka la ïakhun la arsien ïa ka elekshon MLA, nyngkong ha ka snem 2013 bad hadien pat ha ka snem 2028. Sa uwei pat u MDC ka NPP u ban ïakhun MLA udei u Bah Alvinson Sawkmie u ban ïakhun pyrshah ïa u Bah Himalaya Muktan Shangpliang na Mawsynram Constituency. U Bah Alvin udei u Deputy Chairman jong ka KHADC. Kawei pat ka MDC kadei ka Kong Macdalyne S. Mawlong, kaba la jop ïa ka elekshon MDC na ka PDF, hynrei ka la phet noh pat sha ka NPP. Ka Kong Macdalyne ka thmu ban ïakhun na Nongpoh Constituency pyrshah ïa u Bah Mayralborn Syiem, uba thmu ban ïakhun na ka UDP.
Na ka Congress pat ki ban ïakhun ki long u Bah Pynshngaiñ N. Syiem, CEM bad Chairman barim ka KHADC bad MLA barim ka Mawsynram. U Bah Pynshngaiñ uba long uwei u nongseng jong ka PDF, u la jop ïa ka elekshon MDC na Mawkhar- Pynthorumkhrah Constituency, u la leit ïasoh biang sha ka Seng Congress hadien ka jingshimti u Bah Vincent Pala ïa ka Meghalaya Pradesh Congress Committee (MPCC). U Bah Syiem imat un ïakhun na Pynthorumkhrah Constituency pyrshah ïa u MLA ba la jop haduh san sien lynter, kata u Bah Alexander Hek. Uwei pat u MDC ka Congress u ban mih madan sha ka lympung 2023 udei u Bah Carness Sohshang na Mawkyrwat Constituency. U Bah Carness uwei na ki MDC ba dang khap Samla h KHADC u la rem salit ha u Bah Renikton Lyngdoh Tongkhar ha elekshon 2018, ha ka por ba u jop na ka HSPDP. U Bah Renik mynta i mat un ïakhun noh na ka UDP. Sa uwei pat u MDC ba shu rem salit ha ka elekshon MLA 2018 un ïakhun biang ha u 2023 bad une udei u Bah Bah Gabriel Wahlang na Nongstoiñ Constituency. U Bah Gabriel u la rem tang 60 vote ha u MLA ba mynta ka Nongstoiñ, u Bah Mac Millan Byrsat jong ka Seng NPP. Nalorkine, don sa arngut ki MDC ka Congress kiban ïakhun MLA bad kita ki long u Bah Ronnie V. Lyngdoh u ban ïakhun na Mylliem. U Bah Ronnie u la long MLA ka Mylliem naduh u snem 2008 haduh 2018. U Bah Charles Marngar, MDC ka Congress na Mawhati un long uwei pat u MDC ban ïakhun ïa ka elekshon MLA 2023.
Na ka Seng HSPDP don tang u Bah Martle Mukhim marwei napdeng ki MDC ki ban ïakhun. U Bah Martle u la dei uwei na ki snar Politician ba la rim ka jylla bad ha u snem 2018 u la shah pynliem ha u Bah Banteidor Lyngdoh jong ka PDF na Mawkynrew Constituency.
Nalor kine ki MDC kiba long ruh ki MLA ha kajuh ka por ki ban ïakhun biang ki long u Bah Lambor Malngiang, MDC bad MLA ka Nongkrem. U Bah Gigur Myrthong, MDC bad MLA ka Mawshynrut. U Bah Pius Marweiñ, MDC bad MLA ka Ranikor bad u Bah Pynïaid Sing Syiem, MDC bad MLA ka Mawryngkneng Constituency.
