Bun ki kylli balei ngim weng noh na ka jingïatrei lang bad ka NPP ha KHADC: Vincent Pala
Shillong, Nailur 20 : U President jong ka Meghalaya Pradesh Congress Committee (MPCC), Bah Vincent H Pala ha ka sngi Thohdieng u la ong ba kadei ka jingshisha ba bun ki paidbah khamtam ki nongtrei party ki la kylli balei ba ka party kam weng noh ïa ka jingïatrei lang bad ka NPP ha Khasi Hills Autonomous District Council.
Haba pynshai ïa kane ka bynta ha ki lad pathai khubor, u President ka party u la ong ba mynta ki ap ïa ka sorkar kan pynkylla neem ïa ka Khyrnit kaba Hynriew. U ong ruh ba na ka Congress kan ym shongshait ne kynran dien namar ki don ka nongrim ym dei eh tang ban jop elekshon hynrei ban pyrkhat ruh ïa ka Jaidbynriew. “Kam myntoi tang ban jop elekshon lada ka Jaidbynriew ka la duh ïa ki hok jong ki. Lada ngi lah ban ïada ïa ka Jaidbynriew watla ngi rem ha ka elekshon ruh ngi sngew kumba jop elekshon.”
U President u la ong ba ki kwah ban pynshai ba ka jingdon bad ka jingïatrei lang jong ki (MDC Congress) ha KHADC kam dei satia ba ki rhah bor namar ki don tang uwei u MLA bad uwei u MDC. Kumta, u ong ba watla ki don tang uwei ne ar ngut ruh hynrei lada ki lah pat ban ïada ïa ki aiñ na ka bynta ka bit ka biang jong ki paidbah tang kata ka la biang palat.
Shwa kane, u President u la pynshai ruh halor ka nongrim ka jijngleit trei lang bad ka NPP ha ka Executive Committee, “Ngi la pyrkhat bha ïa kata naduh shwa ba ngin ïatrei lang bad ka NPP ha District Council. Hynrei dei hadien ba ka don ka jingïakajia ka NPP bad ka UDP, kumta lada ngim leit ban ïatrei lang ka la wan ka jingsynshar da ka sorkar lane ka Administator Rule. Kumta katno kan long ka jingduhnong ïa ki paidbah.”
Shuh shuh u ong ruh ba kawei pat ka bynta kadei namar ka jingdon ka jingthmu ban pynkylla ne pynbha ïa ka Khyrnit kaba Hynriew kaba dei ka aiñ ba ka Sorkar Congress ka ai ha ka por jong i Bah Joy bad kiwei. Kumta u ong ba kum ki nongmihkhmat ba don ha ka party ki la sngewdei ban donkti lang la ka long ha kaban ai jingmut bad ym dei ban shah ba kin pynkylla katba ki mon.
“Ngi dei ban don ka bor ban ai jingmut bad kumta ban ïoh ïa ka ngi dei ban don bynta lang ha District Council. Kumta halor kane ka la don ka jingïakren bunsien hapdeng ka District Council, ka sorkar jylla bad ki bor sorkar na Delhi,” bynrap biang u Bah Vincent.