Bun ki kylli balei nga ïeng ban shim bynta ban kylli jingkylli : Bah Paul Lyngdoh

Shillong, Rymphang 26 : U MLA ka UDP na Shillong West, Bah Paul Lyngdoh ha kane ka sngi Palei u la ong ba u kwah ban pynshai halor ka rai ba u ïeng ban shim bynta ha ka jingïatai ha ka cut motion da kaba pynpaw ba ki jingkylli kiba u rah ka dei da ka thong ban pynkhlain ïa ka rukom treikam ym kaba thmu ïa uno uno u Myntri Sorkar.
Haba ken ha Ïing Dorbar, u Bah Paul u la ong, “Nga kwah ban pynshai balei nga shim bynta ha kane ka cut motion. La kylli ïanga da ki lad pathai khubor kiba nang pyrkhat ba nga takrain shimet ïa u Myntri ka tnad Power,” ong u Bah Paul.
Nangta une u MLA u la ong ruh ba u la man ka por u la buh bun ki jingkylli wat ïa u Myntri Rangbah ka Jylla nangta ïa u Myntri ka tnad PHE bad u la pynkhreh ruh ban buh jingkylli bynrap ïa u Myntri ka tnad Urban Affairs tangba ha kane ka sngi uba buh ïa ka jingkylli u khlem wan bad kane ka la khanglad noh ïa u.
U Bah Paul u la pynshai biang ba katei ka jingleh jong u ka dei shi bynta jongka rukom treikam bad kam dei satia kaba thmu shimet.
“Nga don ka jingngeit ba ngi don hangne ban pynkhlain shuh shuh ïa ka jingtreikam. Ngi don hangne ha ka temple, ka ïingmane jong ka jingsynshar paidbah bad ngi donkam ban bud pyrkhing kum ki dkhot jong ka ïingmane,” u la ong.
Da kaba kdew ïa ka jinglong ba kyrpang jong ka riti synshar paidbah u la ong, “Ki briew ki lah ban leit bad wan hynrei ki tnad treikam kin neh. Ngim don sah hangne junom kum ki dkhot jong ka Ïing Dorbar lane kum ki dkhot jong ka kynhun myntri hynrei ki tnad treikam bad ki rukom treikam ki ïai bteng ban terikam.”