Bun ki kompeni heh kiba tyrwa kam nalor ka tulop da ki phew lak shisnem

Sohra, Risaw 23 : Ka National Institute of Technology (NIT) Meghalaya kan pynlong ïa ka jingpynkup burom lane ka Convocation ïa ki samla kiba la pyndep ïa ki jingpule bapher bapher ha ka 30tarik mynta u bnai ha ka jaka jong ka hi kaba don ha Sohra.
Ha kane ka sngi yn wan ban donlang ruh u Chairman barim ka Indian Oil Corporation Ltd u Shrikant M Vaidya kum u Kongsan katba u Prof. Dhirendra Nath Buragohain ba dei u Founder Director bad ruh u Professor ba la shongthait jong ka IIT Guwahati kum u Symbud Kongsan. Ïa ka jingïalang ha kane ka sngi yn pynïaid da u Chairman jong ka Board of Governors, NIT Meghalaya u Sunil Alagh.
Katkum ka jingïathuh da u Director ka NIT Meghalaya, u Prof. Pinakeswar Mahanta ki la don baroh haduh 250 ngut ki samla pule kiban ïoh pdiang ïa ka Degree ha katei ka sngi. Kine ki kynthup ïa ki 153 ha ka B.Tech, 36 ha ka M.Sc, 24 ngut ha ka M.Tech, bad 37 ha ka Ph.D.
Nalor kine yn sam ruh haduh 15 tylli ki takma sha ki samla bal eh bha ha ki jingpule kynthup lang ïa ki lai ngut ki samla pule kynthei kiba wan shakhmat.
U Director u la ïathuh ruh ba ka NIT Meghalaya ka don haduh 107 ngut ki nonghikai, 332 ngut ki nongtrei bad 1205 ngut ki samla pule kynthuup ïa ki 634 ngut ki Under Graduate bad 581 ngut pat ki Post Graduate bad Ph.D.
Haba batai pat shaphang ka lawei jong ki samla pule hadien ba ki la pyndep ïa ka jingshah hikai na katei ka skulbah, u Director ula ong, “Palat 64.7 persen na ki samla pule kiba pyndep na kane ka jaka pule ki la ïoh kam bad na kine haduh 55 persen ki ïoh ïa ka jingtyrwa na kylleng ki jaka ban trei.”
Shuh shuh u ïathuh ruh ba don napdeng ki samla pule kiba la ïoh ïa ka jingtyrwa ban trei ha ka tulop kaba kot sha ka 52 lak tyngka ha ka shisnem kum ha Amazon. U ong ruh ba lada shu khein kyllum ka tulop kaba rit eh ba ki samla pule ki ïoh ïa ka jingtyrwa ban trei ka long 11.75 lak shisnem ne kumba 1 lak duna ha ka shibnai.
“Na kine, ki don kumba 20-25 persen kiwei pat ki samla kiba bteng ïa ki jingpule kham shajrong ha kaba don ruh kiba leit ban pyntbit shuh shuh wat ha ki jaka pule sha bar ri ruh,” bynrap biang u Director.
Katkum ka jingiathuh jong u, ki kompeni kiba kham hakhmat ban aikam ki kynthup naduh ka Amazon, Microsoft, BPCL, L&T, Cisco, Deloitte nalor kiwei kiwei
U la ïathuh ba ki samla pule jong ka NIT Meghalaya ki la ïoh ruh ïa ka jingithuh ha ki lympung kiba heh ha ka ri bad wat ha ki lympung barri kumjuh kum ha ka Best Paper Awards, bad Gold Medal ha ki jingïakob shabar kum ka International Astronomy and Astrophysics Competition bad ruh ha ka All India Inter-NIT Power Sports Championship.