Nongstoiñ, Jymmang 19: Watla ka thaiñ Langpih ka dei ka jaka ka bym pat lah ban pynthikna la ka dei jong ka Meghalaya ne jong ka Assam ruh, hynrei naduh ba la dep shna ïa ka surok bad ki kam pynroi na ka sorkar ki la sdang ban poi khah khah bun bah ki briew na kylleng ki jaka ki la jawdud ban kam ne thied jaka ha katei ka thaiñ.
Ha ki snem ba mynshuwa ka la don ka jingpynbna ba kin don da ki spah tylli ki longïing na kiwei pat ki jaka ki ba la pan jingbit na ki nongsynshar katei ka thaiñ ba kin wan shong shnong, hynrei ym tip na kano ka daw kim shym la wan satia. Nalor kata da ki phew ngut ki briew na ki shnong bapher bapher jong ka West Khasi Hills, ki la kwah bha ban leit thied jaka namar ka dei ka jaka kaba sei soh bha ha ka rep ka riang.
U Bah T.Marweiñ uwei na ki riew rangbah ka thaiñ Nonglang Langpih, u la ong ba ki la don ruh katto katne ngut kiba naduh u snem 2009-10, ki la leit rung shnong ha katei ka thaiñ bad ki la don la ka ïing ka sem, ka kper ka phrah, ki jingthung jingtep bad ki la long ki trai shnong ba pura ha katei ka thaiñ.
Hynrei, u la ong naduh u snem 2017 ba ka Khasi Hills Autonomous District Council ka la pynim biang ïa ka hima Nongmynsaw bad ka la thung ruh Acting Syiem ha katei ka hima, ba ki nongshong shnong na kylleng ki jaka hapoh West Khasi Hills ki la sdang ban tur puk puk sha katei ka thaiñ ban wad jaka da kaba ïa sngewthuh jingmut bad utei u Acting Syiem.
U la ong ruh ba haduh kine ki sngi da ki phew ngut ki briew ki la wan thied jaka ha katei ka thaiñ, hynrei kaba lyngngoh ka long ba kim treh pat ban wan shong shnong. Katei ka jingthied ïa ki jaka ki puta ha katei ka thaiñ ka lah ban wanrah pynban ïa ka jingeh ïa ki trai shnong, namar katba nang mih ki snem ka jingdon briew ka nang kiew bad ki jaka rep ki la nang donkam kham bun kumta kan buh ha ka jingeh ïa ki khun ki kti bad ka pateng ban wan.
U la ong ruh ba ka jingbym wan shong wan sah ha ki jaka ba ki la kam bad thied ha katei ka thaiñ, ka pynpaw shai kdar ba ki dei tang ki briew kiba kwah ban shu wan kjit ïa ka spah ka phew kaba mih na katei ka jaka, hynrei kim don ka jingkitkhlieh ban ïada ïa ki paidbah nongshong shnong katei ka thaiñ.
