Shillong, Nailar 01: Ka District Health Society, National Health Mission East Khasi Hills ha ka sngi Palei ka la plie ïa ka World Breastfeeding Week 2024 ne ka jingrakhe ïa ka taïew ai buiñ kmie ha ka pyrthei baroh kawei halor ka phang “Closing the gap: Breastfeeding support for all”.
Haba kren ha ka jingïalang ka Myntri kaba khmih ïa ka tnat Health and Family Welfare ka Dr. M Ampareen Lyngdoh ka la batai ïa ka jingdonkam ban ïasam ïa ki jingtip shaphang ka jingbuiñ bad ki jingmyntoi kiba ïoh na ka, da kaba ong, “Bun ki jingmyntoi ba ïoh na ka jingai buiñ ka kmie.”
Ka Dr Lyngdoh ka la sam ruh ïa ki jingïoh mad jong ka shimet kum ka kmie bad ka pynpaw ka jingsngewkhia shaphang ka jingshah ktah na ka jingpang niangpyrsit kaba khlem ïoh jingsumar kaba la ktah ïa ka koit ka khiah jong ka bor pyrkhat.
Na ka liang ka Myntri ka la banjur ïa ka jingdonkam ban pyntreikam ïa ka hok ki kmie ban shim shuti kaba dei ban jlan haduh 6 bnai hadien ba ki la dep ban kha khyllung, khlem da peit ïa ka kyrdan ba ki trei, bad ka la kyntu ïa ki ophisar ban pynthikna ïa ka jingpyntreikam ïa kane ka policy.
Ka la banjur ruh ïa ka jingdonkam ban pynshlur bad ban pynneh ïa ka jingai buiñ na ka kmie bad pynshlur ruh ïa ki nongtrei ka koit ka khiah bad ki ASHA ban ai ki jingpynsngewthuh shaphang ki jingmyntoi ba la ïoh na ka jingai buiñ.
