Nongstoiñ, Naitung 16: Ka jingangnud jong ki paitbah ka thaiñ Rambrai ban don ïa ka surok kaba bha ka la urlong, namar ha kaba mynta u snem ïa ka jingpyntrei ïa ka phase kaba nyngkong la jan dep artad bad kiba dang kham shim por ki dei satang ki jingkieng, kata ka jingkieng ha Syllang bad wah Rambrai ha Mawthaw.
Ki nongpynïaid jong ka Kompeni kaba pyntrei ïa katei ka surok haba ïakren bad u nongthoh khubor, ki la ong ba naduh Nongstoiñ haduh Rambrai ki lah dep lut, hynrei kiba dang kham shimpor ki dei tang ki jingkieng.
Ha kaba ïadei bad ka jingpyntrei ïa ka bynta ba ar kaba pynpoi haduh Kyrshai pat, haduh mynta ym pat lah ban ong namar la ïoh jingtip ba ha ka jingsorjamin bad ka jingthew jingwoh ïa ki jaka ba katei ka surok ka dei ban ïaid lyngba la dep pynbit pynbiang, hynrei na ka daw ba ka laiñ ba la sorbe mynshuwa kam biang satia, kumta la hap ban pynkylla ïa ka laiñ na sha kawei pat ka liang bad ba katei ka surok.
Ha kaba ïadei bad ka jingpyntrei ïa katei ka surok, na ka liang ki paitbah ka thaiñ Rambrai ki la pynpaw ïa ka jingsngewkmen, namar ba naduh ba katei ka surok ka la sniew ka leit ka wan, ka kit ka bah ka la thud haduh katta katta bad ka bai shong kali na Rambrai shaduh Nongstoiñ kaba jngai tang arphew kilomitar, ka la ïa ryngkat bad ka bai shong kali na Nongstoiñ sha Shillong kaba jngai 85 kilomitar.
Nalor kata ki la ong ruh ba ka jingkiew dor jong ki mar ki mata ha ïew Rambrai ruh ka dei namar ba ki kali kiba kit mar ki la hap ban shim tam ïa ka bai kit namar ka jingsniew palat ka surok.
Kiwei pat ki nongshong shnong na ki thaiñ Rimen naduh ka shnong Sohmynthar, Mawthir, Mawdumdum, Kyllang bad kiwei kiwei ki shnong kiba katei ka surok ka ïaid lyngba, ki la ong ba lada ïa katei ka surok ka la dep ban pyntrei haduh Kyrshai, kan long ka jingkyrkhu kaba khraw ïa ki paitbah nongshong shnong. Namar baroh ki paitbah ki im da ka rep ka riang bad ki jaka ruh ki dei kiba sei soh bha ha kaba ki soh ki pai,bad kiba bun ki mar rep ki mih bha.
Ki la ong ba lada katei ka surok ka la poi haduh Kyrshai, ki nongdie jingdie ki la suk shibun ban leit thied mar naduh Guwahati, namar ka la jan bha bad ka ïew khappud bad ka Assam ka la don ha Ukiam. Ki la ong ruh ba wat la ka jingsdang ban pyntrei ka la dei ha ka aïom slap bad ka surok ka la ktieh bha. Hynrei ki la kyrpad ïa ki paitbah nongleit nongwan ba kin ïaishah shi por haduh ban da dep ïa ka surok kaba bha.
