Nongstoiñ, Jylliew, 30: Ka FKJGP Nongstoiñ Circle ha ka jingïalam jong u Bah Pynshai Kharbani President FKJGP Nongstoiñ Circle ha ryngkat ka jingsynran lang u Bah Williston Walker Syiem General Secretary ka FKJGP West Khasi Hills ha ka sngi balang, ki la leit ban ïakynduh ïa u Medical Superintendent jong ka Civil Hospital Nongstoiñ, halor ka jingduna ki tiar test khamtam eh ka Blood test, ka X-ray, ka Scanning machine bad kiwei kiwei ruh.
Na ka liang ka seng ka la jurip bad ka la lap ruh shibun ki jingduna hapoh ka Hospital, kata naduh ka jingduna ki nongtrei, ka Internet, ki Ambulance bad ki kamra treikam. Kane ka la buh jingeh ïa ka Civil Hospital ban ai ka jingshakri kaba paka na ka bynta ki paidbah ka thaiñ.
Ka seng ka kyntu jur ïa ka Sorkar bad ki bor ba dei peit ïa ka tnad ka koit ka khiah hapoh ka jylla, ba kin pynbiang noh kloi ïa kine ki jingduna, khnang ba ki paidbah kin lait noh ïa kine ki jingeh ba ki mad man ka sngi.
