Shillontg, Nailur 26: Ki nongïalam ka Cncern Citizen of Hynñiewtrep(CCH) ha ka 22 tarik Nailur ki la leit ban ai dorkhas sha ka Sub- Divisional School Education Officer(SDSEO) ban ai ka kaiphot jong ki hadien ba ki la dep ban wan jurip ïa ka skul Nongpiur Upper Primary SSA, School Nongpiur ban pyntip ïa ka ophisar halor ki jingduna kiba bun ha kane ka skul.
Haba kren sha ki lad pathai khubor u President ka seng u Samkupar Tron u la ïathuh ba ka jingleit aiti ka seng ïa ka kaiphot sha ka Opisar ka long ban ai jingtip ïa kiba bun ki jingduna ha kane ka skul ba kynthup naduh ka jingbym don lait, ki paiñkhana ki bym biang, ka jingbym don ki komputor watla kane ka skul ka la ai jinghikai ha kane ka subject, bad ka jingduna palat ki nonghikai bad ki subject.
U la ong ba ha ka jingshisha kane ka skul ka la ai jinghikai ka subject computer hynrei tang kawei ka kor computer kam don satia bad u la ong ruh wat tang ka bording ruh kam don satia.
U la ong ruh ba ka seng ka la lap ïa ka jingbym don ki paiñkhana kiba biang namr ki khynnah skul bad shynraang bad kynthei ki hap leit lang beit ha ka juh ka paiñkhana bad ruh ïa ka jingbym don ki subject kiba dei ban don ha kane ka skul namar ka jingduna palat ki nonghikai ban ai jingshakri ïa ki khynnah.
“Na ka liang ka SDSEO ka la pynpaw ïa ka jingsngewkmen ba ngin leit aiti ïa ka kaiphot namar na ka liang ka ophis kan lah ban shim ïa ki sienjam ban kham pynbiang ka jingdonkam mjontg ki khynnah skul bad ka skul hi baroh kawei” ong u Bah Samkupar.
Shuh shuh u la ïathuh ba na ka liang ka ophis ka la kular ban shimkhia ban phah jingthoh sha ki bor ba dei peit jong kane ka skul khnang ba kin lah ban leh kaba donkam.
