Nongpoh, Jylliew 04 : Ban myntoi ki paidbah ka thaiñ ha ka liang ban ïoh ka jingsumar kaba bit ba biang ha ka pang ka shitom bad ha kiwei kiwei ki jingdonkam na ka bynta ka koit ka khiah ki paidbah, ka Confederation of Ri Bhoi People (CoRP), Sengkmie ha ka jingïalam u Bah Bandari Ryntathiang ki la leit ban jurip ïa ka PHC Mawhati ha ka sngi Saitjaiñ bad lam shibun ki jingduna nalor ba ka sorkar ka buh tang uwei u Doctor ban shakri da ki phew hajar ngut ki paidbah kiba donkam ïa ka jingsumar ha ka pang ka shitom.
Kane ka jingleit jurip ki nongïalam ka CoRP ïa katei ka jaka ai jingsumar, ka dei hadien ba bun ki paidbah ki la ud la nam halor shibun ki jingduna ba ki ai kynduh ha katei ka jaka ai jingsumar khamtam ka jingbuh ka sorkar tang uwei u Doctor ban ai ka jingsumar ïa ki paidbah ka la buh jingeh shisha ïa ki paidbah ha ka pang ka shitom.
Kumba la ïoh lum jingtip ha kane ka PHC ki don haduh 43 tylli ki shnong bad ka jingbun paid ka la kot sha ka 35 hajar ngut, hynrei ka dang dei tang ka kyrdan PHC kaba ki paidbah ki mad jingeh shisha ha ka pang ka shitom ban wan ai jingsumar ha kane ka jaka ai jingsumar ba ka sorkar ka dang buh tang uwei u Doctor lane uta u medical officer.
Dei halor shibun ki jingduna kiba dang duna ha katei ka jaka ai jingsumar, ki nongïalam ka CoRP ki la hiar ban juirip ban wad ïa ka jingshisha bad kumba la lap ha kane ka jingleit jurip la lap shisha ba ki paidbah ki kynduh mawsiang ha ka pang ka shitom ha kaba ki hap ban ieng line da ki spah ngut bad khamta ka jingdon tang uwei u doctor ka la buh jingeh ïa ki nongpang ban ïoh ïa ka jingsumar ha ka por kaba biang.
La sakhi lang ruh ha kane ka sngi ba la leit ban jurip da ka jingdon lang u Bah Pateng Marsing uba dei u Working President, u Bah Phrang Sohtun uba dei u Vie President, u Bah Juban Swer uba dei u President jong ka CoRP Nothern Zone ryngkat bad kiwei kiwei ki dkhot jong ka Seng.
Ki dkhot ka seng haba ki la ïoh ïaka lad ban kynduh ïa u Dr Kitborlang Pariat uba dei u Medical Health Officer, u la pynpaw ba ka long kaba eh bha ban ai ïaka jingshakri namar kiba bun ki jingduna kiba na ka liang ka sorkar kam shem la pynbiang ha kane ka jaka ai jingsumar.
Utei u Doctor u la ïathuh ruh ba ka long kaba eh bha ïa u ban pynbiang ïaka por ban ai jingsumar bad ban leit mihkhmat ïaki meeting bapher bapher kynthup de ïaki training bapher bapher kiba la ju pynlong na ka por sha ka por namar haba leit meeting lah hap ban iehnoh ïaki nongpang kiba wan man la ka sngi ban wan wad jingkoit jingkhiah na kane ka jaka ai jingsumar, khamtam haki sngi iew kiba ki paidbah kiba na jngai ki wan ban phah sumar bad shim dawai na kane ka hospital.
Haba kren sha ki lad pathai khubor, u Bah pateng Marsing u la ong ba ka sorkar ka lah dei ka por ban kyntiew kyrdan noh ïa kane ka PHC sha ka CHC khnang ba ki paidbah kin ïoh ïaka jingsumar kaba biang bad lada kam dei ha kata ka rukom ruh kan jin da lah bha shibun ban kyntiew kyrdan shwa ïaka Sub Centre kaba don ha kiwei kiwei ki jaka kiba hap hapoh kane ka PHC Mawhati.
Shuh shuh, u la ong ruh katba ka sorkar kam pat lah ban kyntiew kyrdan ïa kane ka jaka ai jingsumar ka la dei ban pynbiang ruh ïa ki Doctor ban ai jingsumar na ka bynta ki paidbah, namar kam dei ka kam kaba suk ba tang uwei u Doctor un ai jingsumar nalor ba hap ban kit khlieh ruh kiwei kiwei ki kam jong ka PHC kiba ban leit shabar na ka PHC kaba u hap ban iehnoh ïa ki nongpang bad kiba wan ai jingsumar, u la bynrap.
