Ha bymdon ka jingiohi jngai, ki briew ki jot noh” ne “ki briew jong nga ki jot noh namar ba kim don ka jingiohi jngai” kine ki dei ki kyntien ba lah ban shem na ka kotbah. Ka long kaba shisha haba ki nongialam jong ka jylla kim shym la long kiba ïohi jngai ha ki phew snem kiba la leit noh, ka wanrah shibun ki jingeh ha kine ki sngi kiba mynta. Ka jingïohi jngai ka long namarkata kaba donkam eh naduh ha kaba ïadei bad shimet shimet, haduh kaba ïadei bad ka longiing longsem bad wat haduh ka synshar ka khadar. Ka jingïohi jngai ka hikai ïa iwei pat iwei kumno ban im bad kumno ban leh mynta khnang ba ka lashai kan long kaba suk. Namar kata ha ka jingim kaba man la ka sngi ka long kaba donkam ban puson bad pyrkhat na ka bynta ka lashai kaba khambha. Kaei kaba ki long shuwa ki la ieh khlem da pyrkhat lypa ka buh ïa ki dieng-pynkiang ïa ki longdien jong kane ka pateng bynriew kaba mynta. Hato kane kam lah biang ban ai jinghikai ïa ngi kumno ban ai pateng pat ïa kaba khambha sha ki longdien jong ngi.
Kumba ki ju ong ba ka lawei jong kane ka pateng kaba mynta ka shong eh ha ka kti jong ki samla, hynrei ka long kaba duh nong shibun ban ïohi ba bun na ki samla kim shemphang ïa kane. Bun ki samla ki jot noh bad ki ngop noh ha kiba bun ki kam ba pynlut leh nohei ïa ka por kawei na ka daw ka dei ba kim kwah ban peit jngai ne ba kim don ka jingiohi jngai. Hynrei ym lah ban len ba kito kiba don ïa ka jingiohi jngai wat hapdeng jong shibun ki jingeh ki kiew shaphrang bad wat la ka mynnor jong ki ka la long kaba dap da ka jingeh bad ki diengpynkiang, hynrei mynta pat ki long kiba biang kiba bit ha kiba bun ki liang. Kane ka long tang ka nuksa kaba rit bad bun lehse ki lah ban ong “ngin lah leh aïu ma ngi” pynban ka jingïohi jngai jong iwei pat iwei ka long ka lawei jong ka pateng ka ban dang wan.
Kawei na ka jingiohi jngai kaba ktah eh ka dei ka jingiohi jngai jong ki paidbah hi, lada ki paidbah kim long kiba ïohi jngai kane ka ri bad ka shnong jong ngi kan nang suhsat nang suhsat katba nangmih ki sngi. Kaei kaba ki paidbah kim shym la lah ban ïohi jngai ha kine ki 50 snem kiba la leit ka la buh jingeh shi katdei eh ha kaba ïadei bad u pud u sam jong ka jylla, ka jingwan buhai shnong jong ki heh paid ri thor, ka jingshah khnieh ïa ka hok ban ïoh kam ïoh jam, ka jingshah khñoit ha ka khaii ka pateng bad bun bah kiwei.Ka jingbym iohi jngai jong ki paidbah ka kylla long ka jingpang ïa ka synshar khardar ha ka jylla ha kaba ki briew ki bymdon nongrim ne jingshemphang ei ei shaphang ka shynshar ka khadar bad ki kam thaw aiñ ki bat ïa ka bor bad ka shuki tang na ka bynta ka jingmyntoi shimet jongki.
Ki riew shemphang ki ong, “kaei kaba ngi kum ki nongshong shnong ngi lah ban leh ei ei na bynta la ka ri”, katba ki briew ki bym don ka jingiohi jngai ki kylli kylla kaei ba ka ri ka lah ban leh na ka bynta jong ki. Ha ka jingbymshemphang ki peit pynban sha ka sorkar ban leh ei ei na ka bynta jongki, katba ha ka jingshisha ki dei ma ki hi kata ka sorkar ne ka bor jong u paidbah. Ha kine ki sngi ngi ïohi ba ki paidbah ki peit sha ki nongmihkhmat ba kin leh ei ei na ka bynta jongki, ha ka jingshisha ki dei ki paidbah kiba la dep ban jied ia ki nongmihkhmat bad haba ki jied ïa ki nongmihkhmat ka mut ki la leh ei ei na ka bynta ka ri. Hynrei balei ba kita ki nongmihkhmat kim lah ban leh ei ei na ka bynta ki paidbah, kawei ka long ba ki paidbah ki la jied bakla ïa ki, ki paidbah ki la jied ïa ki tang na ka bynta ba ki shah thong pisa bad i la jied tang ka bynta ba ki don ka jingïadei ne ka jingïoh jingïarap shimet jong ki. Dei hangne keiñ ba sa ong ba ki briew ki jot noh namar ba kim don ïa ka jingïohi jngai.
