Ha bymdon ka jingiohi jngai, ki briew ki jot noh” ne “ki briew jong nga ki jot not namar ba kim don ka jingïohi jngai” kine ki dei ki kyntien ba lah ban shem na ka kitab proverb. La kynnoh ruh ba dei ba ki nongïalam jong ka jylla kim shym la ïohi jngai ha ki phew snem kiba la leit noh bad la wanrah shibun ki jingeh ha ki sngi kiba mynta. Ka jingïohi jngai ka long namarkata kaba donkam eh naduh ha kaba ïadei bad shimet shimet, haduh kaba ïadei bad ka longïing longsem bad wat haduh ka synshar ka khadar. Ka jingïohi jngai ka hikai ïa ngi kumno ban im mynta khnang ba ka lashai kan long kaba suk. Namar kata ha ka jingim kaba man la ka sngi ka long kaba donkam ban puson bad pyrkhat na ka bynta ka lashai kaba khambha. Kaei kaba ki long shuwa ki la ieh khlem da pyrkhat lypa ka buh ïa ki dieng-pynkiang ïa ki longdien kane ka pateng bynriew kaba mynta. Hato kane kam lah biang ban ai jinghikai ïa ngi kumno ban ai pateng pat ïa kaba khambha sha ki longdien jong ngi.
Kumba ki ju ong ba ka lawei jong kane ka pateng kaba mynta ka shong eh ha ka kti jong ki samla, hynrei ka long kaba duh nong shibun ban iohi ba bun na ki samla kim shemphang ia kane. Bun ki samla ki jot noh bad ki ngop noh ha kiba bun ki kam ba pynlut leh nohei ia ka por kawei na ka daw ka dei ba kim kwah ban peit jngai ne ba kim don ka jingiohi jngai. Hynrei ym lah ban len ba kito kiba don ia ka jingiohi jngai wat hapdeng jong shibun ki jingeh ki kiew shaphrang bad wat la ka mynnor jong ki ka la long kaba dap da ka jingeh bad ki diengpynkiang, hynrei mynta pat ki long kiba biang kiba bit ha kiba bun ki liang. Kane ka long tang ka nuksa kaba rit bad bun lehse ki lah ban ong “ngin lah leh aiu ma ngi” pynban ka jingiohi jngai jong iwei pat iwei ka long ka lawei jong ka pateng ka ban dang wan.
Kawei na ka jingiohi jngai kaba ktah eh ka dei ka jingiohi jngai jong ki paidbah hi, lada ki paidbah kim long kiba iohi jngai kane ka ri bad ka shnong jong ngi kan nang suhsat nang suhsat katba nangmih ki sngi. Kaei kaba ki paidbah kim shym la lah ban iohi jngai ha kine ki 50 snem kiba la leit ka la buh jingeh shi katdei eh ha kaba iadei bad u pud u sam jong ka jylla, ka jingwan buhai shnong jong ki heh paid ri thor, ka jingshah khnieh ia ka hok ban ioh kam ioh jam, ka jingshah khnoit ha ka khaii ka pateng bad bun bah kiwei.Ka jingbym iohi jngai jong ki paidbah ka kylla long ka jingpang ia ka synshar khardar ha ka jylla ha kaba ki briew ki bymdon nongrim ne jingshemphang ei ei shaphang ka shynshar ka khadar bad ki kam thaw ain ki bat ia ka bor bad ka shuki tang na ka bynta ka jingmyntoi shimet jongki.
Ki riew shemphang ki ong, “kaei kaba ngi kum ki nongshong shnong ngi lah ban leh ei ei na bynta la ka ri”, katba ki briew ki bym don ka jingiohi jngai ki kylli kylla kaei ba ka ri ka lah ban leh na ka bynta jong ki. Ha ka jingbymshemphang ki peit sha ka sorkar ban leh ei ei na ka bynta jongki, katba ha ka jingshisha ki dei ma ki kata ka sorkar. Ha kine ki sngi ngi iohi ba ki paidbah ki peit sha ki nongmihkhmat ba kin leh ei ei na ka bynta jongki, ha ka jingshisha ki dei ki paidbah kiba la dep ban jied ia ki nongmihkhmat bad haba ki jied ia ki nongmihkhamt ka mut ki la leh ei ei na ka bynta ka ri. Hynrei balei ba kitei ki nongmihkhmat ki lah ban leh ei ei na ka bynta ki paidbah, kawei ka long ba ki paidbah ki la jied bakla ia ki, ki paidbah ki la jied ia ki tang na ka bynta ba ki shah thong pisa bad i la jied tang ka bynta ba ki don ka jingiadei ne ka jingioh jingiarap shimet jong ki.
Kumta ym slem shuh bad shen ki paidbah kin sa ïoh ban jied biang ia ki nongmihkhmat sha ki Autonomous District Council bad ki ki donkam ka long kiba ïohi jngai. Ban iohi jngai ka long ban leh ia la ka kamram kaba bha tam naduh ba sdang ban mih madan ki kyrton da bishar bniah bha bad peit ba ki kyrtong ba ki jied kin dei ban long ki briew kiba iohi jngai lang. Kumjuh ruh ki paidbah kim dei ban jied ia ki kyrtong kiba pynbieit ia ki da ka pisa bad pynmatlah ia katei ka jingiohi jngai jong ki. Ka pisa barabor ka pynmatlah ia kiba bun. Lada ki paidbah ki long shisha kiba iohi jngai kito ki kyrtong theh pisa kin long tang ki bula hakhmat ki paidbah. Ka jingpdiang jong ki paidbah ia ka pisa ba la pynbeij da ki kyrtong ka la dei lypa ka jingjot jong ka lashai, namar ba kitei ki kyrtong hadien jong ka Election kin sa durut ym ban trei na ka bynta ki paidbah hynrei ban khyllie jinglut na ka bynta ia lade. Kumba julong ki don shibun ki kyrtong ki bymdei hok ban long ki nongmihkhmat paidbah hynrei tang namar ka jingkwah burom bad ka jing kangar ia ka bor jong ka politik!!.
